Nashik Crime News : युवकावर धारदार शस्त्राने हल्ला

Nashik Crime News : गाडीचा कट लागल्याच्या झालेल्या वादातून शिवशक्ती चौक येथे युवकावर दोघांसह एका विधीसंघर्षित बालकाने धारदार शस्त्राने प्राणघातक हल्ला केला.

मारहाणीत युवक गंभीर जखमी असून, शासकीय रुग्णालयात उपचार सुरू आहेत.(Assault on youth with sharp weapon nashik crime news)

फिर्यादी मयूर भागवत चौधरी (२३, शिवशक्ती चौक) यांचा भाचा आदित्य पाटील याच्याशी संशयित तौसिफ शेख, हेमंत गोला व एक विधिसंघर्षित यांच्यासमवेत गाडीचा कट लागल्याहून भांडण झाले होते.

यानंतर संशयित फिर्यादी यांच्या घर परिसरात जाऊन शिवीगाळ करत होते. ही बाब फिर्यादी यांचा भाऊ ओम यास समजल्याने तो वाद मिटविण्यासाठी गेला असता, त्यास मारहाण करण्यास सुरवात केली.

संशयित तौसिफ शेख, हेमंत गोला यांनी धारदार शस्त्राने ओमवर प्राणघातक हल्ला केला. फिर्यादी मयूर चौधरी भावाला वाचविण्यासाठी गेले असता, त्यांना जोरदार धक्का दिला. यानंतर नादाला लागला तर मुडदा पाडू, असा दम दिला.

जखमी ओम यास शासकीय जिल्हा रुग्णालयात उपचारासाठी दाखल केले असून, संशयीतांना अंबड पोलिसांनी ताब्यात घेऊन गुन्हा दाखल केला आहे.