Nashik News : अंबड घरकुल योजना वसाहतीतील जलकुंभात आढळला तरुणाचा मृतदेह

सिडको : चार दिवसापासून बेपत्ता असलेल्या २१ वर्षीय तरुणाचा अंबड घरकुल योजना वसाहतीतील जलकुंभात मृतदेह आढळल्याने एकच खळबळ उडाली आहे.

माहिती मिळताच पोलिसांसह अग्निशमन विभागाचे पथक दाखल होऊन गुरुवारी (ता. २५) दुपारी एकच्या सुमारास मृतदेह पाण्याबाहेर काढण्यात आला. (body of young man found in water tank in ambad Gharkul Yojana Colony Nashik News)

संदीप दशरथ शिंदे (रा. घरकुल योजना), असे मयत तरुणाचे नाव आहे. २२ जानेवारीपासून तो घरात नसल्याने याबाबत अंबड पोलिस ठाण्यात बेपत्ताची तक्रार दाखल करण्यात आली होती.

गुरुवारी दुपारी एकच्या सुमारास घरकुल योजना येथील एका जलकुंभात त्याचा मृतदेह आढळून आला. या वेळी स्थानिक नागरिकांनी मोठी गर्दी केली होती.

अग्निशमन विभागाने शर्तीच्या प्रयत्न करून मृतदेह पाण्याबाहेर काढला याप्रकरणी एमआयडीसी तसेच अंबड पोलिस ठाण्यात अकस्मात मृत्यूची नोंद करण्यात आली आहे.