Bhimashankar Controversy | पंढरपूरच्या विठ्ठलासह तुळजापूर, सप्तशृंगही न्या! : आसामच्या CM ना भुजबळांचा टोला

नाशिक : भिमाशंकर आसाममध्ये असल्याचा दावा आसामच्या मुख्यमंत्र्यांनी केल्याप्रकरणी त्याची खिल्ली उडवत माजी उपमुख्यमंत्री छगन भुजबळ यांनी चाळीस आमदार गुवाहाटीला गेले असताना तुम्ही आम्हाला मदत करा, आम्ही तुम्हाला सर्व देऊ असे तरी सांगितले नसेल ना?

असे म्हणत श्री. भुजबळ यांनी भिमाशंकर, पंढरपूरचा विठ्ठल, तुळजापूरचे तुळजाभवानी, सप्तशृंग घेऊन जा, अशा शब्दांत टोला लगावला. (chhagan bhujbal statement Trolled Assam CM over bhimashaknar controversy Nashik News)

पत्रकारांशी संवाद साधताना श्री. भुजबळ यांनी महागाई, बेरोजगारी, कामगार, शेतकरी अशा ज्वलंत प्रश्‍नांवरील लक्ष विचलित करण्यासाठी नवे फंडे काढत चर्चा घडवली जात आहे, अशी टीका केली.

राष्ट्रवादी काँग्रेसचे आमदार जितेंद्र आव्हाड यांना देण्यात आलेल्या धमकीविषयी श्री. भुजबळ म्हणाले, की धमकी देणारे कोण आहेत, याचा शोध घेऊन पोलिसांनी कारवाई करावी. तसेच पोलिस कोठडीतून फोन कसे करता येतात? मोबाईल कसे मिळतात? हे सरकार आणि पोलिसांनी पाहावयास हवे.

हेही वाचा : अल्पमतातील निवाडे आणि सामान्य माणूस

ठाकरे अन महाविकासबद्दल सहानुभूति

शिवसेना, निवडणूक चिन्ह कोणाचे? अशी चर्चा घडवली जात असताना नेते, कार्यकर्ते एकीकडून तिकडे जात आहेत. त्यातून उद्धव ठाकरे आणि महाविकास आघाडीबद्दल सहानुभूति वाढत आहे.

शिवाय मतदार हलणार नाही, असा दावा श्री. भुजबळ यांनी केला. सर्वोच्च न्यायालयातील सुनावणीबद्दल पत्रकारांनी विचारलेल्या प्रश्‍नावर बोलताना श्री. भुजबळ म्हणाले, की विधीज्ञ विविध मुद्दे मांडताहेत. कायद्याची गुंतागुंत झाली आहे. त्यामुळे विधीज्ञ आणि सर्वोच्च न्यायालय कसे मार्ग काढते हे समजेल.