Nashik News : कॉलेजरोडला कार थेट दुभाजकावरच; अंधुक पथदीपांमुळे घडली घटना

नाशिक : कॉलेजरोड परिसरातील एका रस्त्यावर पथदीपांचा प्रकाश अंधुक असल्याने नियंत्रण सुटलेली कार थेट रस्त्यातील दुभाजकावरच जाऊन अडकल्याची घटना रविवारी (ता. २२) रात्री घडली. सुदैवाने यात कोणतीही जीवितहानी झाली नाही.

मात्र, वाहतूक कोंडी झाली होती. वेळीच पोलीस घटनास्थळी पोहोचल्यानंतर वाहतूक सुरळीत करण्यात आली. दरम्यान, या रस्त्यावरील पथदीप बदलण्याची मागणी परिसरातील वाहनचालक व नागरिकांनी केली आहे.

पोलिसांनी दिलेल्या माहितीनुसार, कॉलेजरोड परिसरातील बीवायके कॉलेजच्या पाठीमागील बाजूला असलेल्या रस्त्यालगतच्या पथदीपांचा प्रकाश अंधूक असून, त्यामुळे रात्रीच्या वेळी वाहने चालविणे चालकांना काहीसे जिकिरीचे ठरते. (College Road car directly at bifurcation incident happened due to dim street lights Nashik News)

प्राप्तिकर उत्पन्न सवलत मर्यादा वाढणार?

याच रस्त्यावरुन रविवारी (ता. २२) रात्री जाणाऱ्या कारचालकाचे नियंत्रण सुटले आणि अंधुक प्रकाशामुळे कार थेट दुभाजकावरच जाऊन अडकली. कारचालकाने प्रसंगावधान राखून वेळीच ब्रेक लावल्याने मोठा अनर्थ टळला. मात्र, वाहन दुभाजकावरच अडकल्याने चालकाचा गोंधळ झाला. तर, यामुळे वाहतुकीचीही कोंडी निर्माण झाली.

गंगापूर पोलिसांनी घटनास्थळी धाव घेत वाहतूक सुरळीत केली. दरम्यान, या मार्गांवरील अंधुक पथदीपांमुळे अनेकदा अपघाताच्या घटना घडल्या असून, महापालिकेने सदरील पथदीप बदलून नवीन पथदीप बसविण्याची मागणी परिसरातील वाहनचालक व नागरिकांनी केली आहे.