World Skills Competition: कौशल्‍य स्‍पर्धा सहभागासाठी 7 जानेवारीपर्यंत मुदत; या संकेतस्‍थळावर करा नोंदणी

World Skills Competition : फ्रान्स (लिओन) येथे पुढील वर्षी २०२४ मध्ये जागतिक कौशल्य स्पर्धा होणार आहे. याकरिता राज्य व जिल्हास्तरीय स्पर्धेत सहभागी होण्यासाठी नाव नोंदणीची मुदत ७ जानेवारीपर्यंत वाढविली आहे. (Deadline for skill competition participation is 7th January nashik news)

जागतिक कौशल्य स्पर्धेत सहभाग नोंदवण्यासाठी जिल्हा,‍ विभाग, राज्य आणि देशस्तरावर स्पर्धा घेतली जाणार आहे. यात कौशल्यधारक पात्र स्पर्धक निवडले जातील. ही स्पर्धा दर दोन वर्षांनी घेण्यात येते.

ही जगातील सर्वात मोठी व्यावसायिक शिक्षण आणि कौशल्य उत्कृष्टता स्पर्धा असून जगभरातील वय वर्ष २३ वर्षांखालील तरुण आणि तरुणींसाठी त्यांच्यातील कौशल्य सादर करण्याची संधी असेल.

या स्पर्धेमध्ये भारतातील कुशल उमेदवारांचे नामांकन करण्याच्या दृष्टीने नाशिक जिल्ह्यातील युवक-युवतींनी ‍विविध ५२ क्षेत्रामध्ये होणाऱ्या स्पर्धेमध्ये सहभागी होण्यासाठी https://kaushalya.mahaswayam.gov.in यावर नोंदणी करण्याचे आवाहन केले आहे.

पात्रतेसंदर्भातील तपशील संकेतस्‍थळावर उपलब्‍ध करून दिला असल्‍याचेही नमूद केले आहे.