वृक्षतोड प्रकरण मिटवून घ्या म्हणणारी ‘ती’ नगरसेविका कोण?

सिडको (नाशिक) : वृक्षतोडीस विरोध करण्याऐवजी वृक्षतोड करणाऱ्यांची बाजू घेत प्रकरण जागेवर मिटवून घ्या म्हणणारी ‘ती’ नगरसेविका कोण, अशी चर्चा सध्या कामटवाडे परिसरातील नागरिकांमध्ये चांगलीच रंगली आहे. एकीकडे शासन, प्रशासन व वृक्षप्रेमी वृक्षरोपणाची मोहीम मोठ्या प्रमाणात राबवत असताना दुसरीकडे कामटवाडे परिसरातील एका ठिकाणी कुठल्याही प्रकारची परवानगी न घेता २० ते २५ वर्षे जुनी एकूण चार झाडे तोडल्याने वृक्षप्रेमींनी नाराजी व्यक्त केली आहे. (Destroyed-cutting-down-25-year-old-trees-nashik-marathi-news)

नागरिकांमध्ये चांगलीच रंगली चर्चा

वृंदावन कॉलनीतील सप्तशृंगी रो-हाउससमोर दिवसाढवळ्या दोन आंब्याची व दोन गुलमोहराची अशी चार झाडे मुळासकट तोडली. वृक्षतोडीस याच परिसरात राहणाऱ्या एका प्रल्हाद नामक वृक्षप्रेमीने कडाडून विरोध केला, परंतु त्यास कोणीही दाद दिली नाही. अखेर त्यांनी या झाडांची लाकडे वाहून येणाऱ्या गाडीसमोर आपले वाहन आडवे करून याबाबत महापालिका व पोलिसांना कळविले व तक्रार केली. महापालिकेचे उद्यान विभागाच्या अधिकारी व कर्मचाऱ्यांनी येथे येऊन पंचनामा केला. पोलिसांनी संबंधित वाहन अंबड पोलिस ठाण्यात जमा केले. यास दोन दिवस होऊनही अद्यापपर्यंत संबंधितांवर गुन्हा दाखल झालेला नाही. त्यावर वृक्षप्रेमींनी नाराजी व्यक्त केली असून, संबंधितांवर कठोर कारवाई करण्यात यावी, अशी मागणी जोर धरू लागली आहे.

पंचवीस वर्षांची चार झाडे तोडल्याने वृक्षप्रेमींकडून नाराजी

दोन आंब्याची व दोन गुलमोहराची २० ते २५ वर्षांपूर्वीची जुनी झाडे डोळ्यासमोर तोडण्यात आली. विरोध करूनही त्यांनी जुमानले नाही. अखेर महापालिका व पोलिस प्रशासनाकडे तक्रार केली. तेव्हा पंचनामा करून ही गाडी अंबड पोलिस ठाण्यात नेण्यात आली. संबंधितांवर वृक्ष प्राधिकरण समितीच्या नव्या नियमानुसार दहा हजार रुपये दंड व गुन्हा दाखल करावा, अशी मागणी करण्यात आली. -जी. डी. प्रल्हाद

निरीक्षक हांडोरे गैरहजर असल्याने अद्यापपर्यंत संबंधितांवर गुन्हा दाखल झालेला नाही. गुरुवारी संबंधित वृक्ष तोडणाऱ्यांवर अंबड पोलिस ठाण्यात गुन्हा दाखल करण्यात येणार आहे. जागेवर जाऊन पंचनामा करण्यात आलेला आहे. -प्रशांत परब, निरीक्षक, उद्यान विभाग, सिडको