Nashik Bribe Crime : महिला उपअभियंता, लिपिक, सहाय्यक अभियंत्याला लाच घेताना अटक

नाशिक रोड : दोन विद्युत रोहित्र हलविण्याच्या कामाचे दोन अंदाजपत्रकांची तपासणी करण्याकामी मदत करून प्रकरण पुढे पाठविण्याच्या मोबदल्यात तक्रारदाराकडे लाच मागणाऱ्या महाराष्ट्र राज्य विद्युत वितरण कंपनीच्या महिला उपअभियंता, लिपिक व सहाय्यक अभियंत्याला लाच मागितल्या प्रकरणी अटक करून गुन्हा दाखल करण्यात आला आहे. (Female Deputy Engineer Clerk Assistant Engineer arrested for accepting bribe Nashik Bribe Crime)

हेही वाचा : संयुक्त नावावरील गृहकर्जातून होईल प्राप्तीकराची बचत...

दीप्ती धीरेन वंजारी (उपकार्यकारी अभियंता, वर्ग-२), सचिन मुरलीधर बोरसे (निम्नस्तरीय लिपिक, वर्ग-३), राजेंद्र साहेबराव पाटील (सहायक अभियंता, वर्ग -२) यांना अटक करण्यात आली आहे. दोन हजार रुपये व अडीच हजार रुपये मागितल्याप्रकरणी तिघांवर उपनगर पोलिस ठाण्यात गुन्हे नोंदविण्यात आले आहे.

तक्रारदार यांना मिळालेल्या योजनेमार्फत दोन विद्युत रोहित्र हलविण्याबाबतचे कामाचे दोन अंदाजपत्रकांची तपासणी करणे, मदत करून प्रकरण पुढे पाठविण्याच्या मोबदल्यात तक्रारदाराकडे पंच साक्षीदार समक्ष उपअभियंता दीप्ती वंजारी, निम्नस्तरीय लिपिक सचिन बोरसे यांनी तक्रारदाराकडे पंच साक्षीदार समक्ष लाचेची मागणी केली.

तसेच सहाय्यक अभियंता साहेबराव पाटील यांनीही विद्युत रोहित्र बसवण्याचे मिळालेल्या कामाचे अंदाजपत्रक मंजुरी कामे मदत करण्याच्या मोबदल्यात तक्रारदाराकडे २५०० रुपयांची पंच साक्षीदार समक्ष लाचेची मागणी केली होती. लाचलुचपत प्रतिबंधक विभागाचे निरीक्षक संदीप साळुंखे यांनी ही कारवाई केली आहे.