Garlic Rates Hike: लसूण 600 रुपये किलो! भाजीची फोडणी झाली जड

Garlic Rates Hike : कसमादेसह परिसरात गेल्या काही महिन्यांपासून लसूण दरातील तेजी कायम आहे. गृहिणींना अवघ्या पावशेर लसणाला १५० रुपये मोजावे लागत असल्याने फोडणी जड झाली आहे.

गृहिणींचे भाजीपाल्याचे आर्थिक बजेट बिघडले आहे. नवीन लसूण हंगाम सुरू होणार असला तरी काही दिवस लसूण महागच राहणार आहे. घाऊक बाजारात लसणाचा तुटवडा जाणवत आहे. (Garlic 600 per kg in kasmade area in malegaon nashik news)

शहरात परराज्यातूनही लसूण येतो. ही आवक राजस्थान व गुजरातमधून होत असूनही कमी पडत आहे. बाजार समितीत लसूण आवक कमी झाली आहे. लसणाचा हंगाम थंडी ओसरल्यानंतर सुरू होतो. जुन्या लसणाच्या प्रतवारीवर परिणाम झाला असून मागणीच्या तुलनेत बाजारात लसणाची आवक कमी आहे.

त्यातच यावर्षी पाऊस कमी झाल्याने दुष्काळाची परिस्थिती असल्याने त्याचाही फटका लसणाच्या उत्पादनावर झाला आहे. नवीन हंगाम सुरू होण्यास किमान अजून २५ ते ३० दिवस लागतील. किरकोळ बाजारात एक किलो लसणाची सहाशे रुपये किलो दराने होत आहे.

प्रतवारीनुसार पाचशे ते सहाशे रुपये किलो दराने लसूण विक्री होत आहे. चांगल्या प्रतीचा लसूण व गावठी लसूण ६०० ते ६५० किलो दराने मिळत आहे. गृहिणींचे बजेट कोलमडले असून येणाऱ्या काळात अशीच महागाई राहिली तर करायचे काय, असा प्रश्न सर्वसामान्यांना पडला आहे. काही शेतकरी भाव असल्याने लसूण बाजारात आणत आहेत. पण तो कच्चा व परिपक्व नसल्याने त्याला फारशी मागणी नाही.