'अमर रहे…'च्या घोषात जवान किशोर शिंदे यांना अखेरचा निरोप | Sakal
sakal

बोलून बातमी शोधा

Government funeral on Veer Jawan Kishor Shinde Nashik News

'अमर रहे…'च्या घोषात जवान किशोर शिंदे यांना अखेरचा निरोप

निफाड (जि. नाशिक) : संपूर्ण जिल्ह्यात वीर जवानांचे गाव म्हणून ओळख असलेल्या नांदुर्डी गावचे भूमिपुत्र (Army Soldier) किशोर गंगाराम शिंदे (वय ३३) यांचे अमृतसर येथे अपघाती निधन झाले. त्यांचे पार्थिव आज सकाळी येताच कुटुंबीयांनी हंबरडा फोडला. त्यांच्या आई अनुसया शिंदे, वडील गंगाधर शिंदे यांच्यासह परिवार दुःखसागरात बुडून गेला. आज येथे किशोर शिंदे यांच्या पार्थिवावर शासकीय इतमामात (Government Funeral) अंत्यसंस्कार करण्यात आले. या घटनेने संपूर्ण तालुक्यासह नांदुर्डी गाव शोकसागरात बुडाले.

‘अमर रहे अमर रहे, किशोर शिंदे अमर रहे’च्या जयघोषाने नांदुर्डीनगरी दुमदुमुन गेली होती. फुलांनी सजविलेल्या रथयात्रेने किशोर शिंदेंची अंत्ययात्रा काढण्यात आली. अखेरचे दर्शन व निरोप देण्यासाठी जिल्ह्यासह तालुक्यातील महिला-बांधवांचा जनसागर उसळला होता. पत्नी काजल, दीड वर्षांची मुलगी वेदिका, वडील गंगाधर शिंदे, आई अनुसया शिंदे, लहान भाऊ संकेत शिंदे, बहीण यांना हुंदकाही फुटेना. किशोर हे घरातील मोठे असल्याने कुटुंबाचा आधारवडच कोसळला आहे.

हेही वाचा: ग्रामपंचायतीच्या आवारातच अंत्यविधी; प्रशासनाचा बेजबाबदारपणा चव्हाट्यावर

किशोर शिंदे यांचे शिक्षण येथील जनता विद्यालयातच झाल्याने त्यांचा मित्रपरिवारही मोठा होता. लहानपणापासूनच किशोर शिंदे यांना देशसेवा व देशभक्तीची ओढ असल्याने दहा वर्षांपूर्वी सीमा सुरक्षा दलात भरती झाले होते. सुरवातीचे काही वर्ष किशोर हे अमृतसर येथे सहकाऱ्यांसोबत राहात होते. चारच महिन्यांपूर्वी गावी येऊन पत्नी काजल व मुलगी वेदिका यांना आपल्यासोबत अमृतसर येथे ते घेऊन गेले होते.

हेही वाचा: पोल्ट्री व्यावसायिक अडचणीत; तहसीलदारांना निवेदन

प्रशासकीय यंत्रणा, ग्रामपालिका नांदुर्डी व किशोर शिंदेच्या संपूर्ण मित्रपरिवाराने त्यांच्या अंत्ययात्रेची तयारी करून काल सकाळी शासकीय इतमामात अंत्यसंस्कार करण्यात आले. सीमा सुरक्षा दलाच्या जवानांकडून किशोर शिंदेंना अखेरची सलामी देण्यात आली. केंद्रीय आरोग्य राज्यमंत्री डॉ. भारती पवार, आमदार दिलीप बनकर, जिल्हा परिषद अध्यक्ष बाळासाहेब क्षीरसागर, यतीन कदम, प्रांताधिकारी अर्चना पठारे, तहसीलदार शरद घोरपडे, जिल्हा माजी सैनिक कार्याध्यक्ष अरुण भंडारे, तालुकाध्यक्ष तुषार खरात, ग्रामस्थांतर्फे सरपंच, उपसरपंच व सदस्यांतर्फे किशोर शिंदेंच्या पार्थिवावर पुष्पचक्र अर्पण करण्यात आले. शोकमग्न वातावरणात मुलगी वेदिकाने पित्यास अग्निडाग दिला.

Web Title: Government Funeral On Veer Jawan Kishor Shinde Nashik News

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top