MSRTC Strike | मनमाड आगाराला प्रतीक्षा कामगारांची

मनमाड (जि. नाशिक) : एसटी संपकऱ्यांना न्यायालयाने २२ एप्रिलपर्यंत कामावर हजर होण्याबाबत कळवले आहे. त्यामुळे संपातील (ST Strike) कर्मचारी आता कामावर येणार का आणि एसटी (ST) पुन्हा सुरळीत होणार का, याची प्रतीक्षा प्रवाशांसह सर्वांनाच लागली आहे.

संपूर्ण एसटी कर्मचाऱ्यांचे शासनात विलीनीकरण करण्याच्या मागणीसाठी गेल्या १५३ दिवसांपासून कर्मचाऱ्यांचा संप सुरू आहे. याबाबत न्यायालयाने सर्व कर्मचाऱ्यांनी २२ एप्रिलपर्यंत कामावर हजर व्हावे. महामंडळाने कर्मचाऱ्यांवर केलेली कारवाई मागे घ्यावी, असे आदेश दिले. परिवहन मंत्र्यांनीही (Minister of Transport) याला सकारात्मक प्रतिसाद दिल्याने आता कर्मचारी काय भूमिका घेतात, याकडे सर्वांचे लक्ष लागले आहे. दरम्यान, कोर्टाने कर्मचाऱ्यांना रुजू होण्याबाबत आदेश दिला असला तरी एसटी महामंडळाचे राज्य सरकारमध्ये विलीनीकरण करावे की नाही, याबाबत अधिक माहिती मिळू शकली नाही. त्यामुळे संपकरी कर्मचाऱ्यासंदर्भात आता काय भूमिका घेतात, राज्य सरकार आणि त्यांच्यात नेमकी काय चर्चा होते, याकडे सर्वांचे लक्ष लागले आहे.

संपकाळात मनमाड आगारातील २३६ कर्मचाऱ्यांपैकी ६४ कर्मचारी कामावर हजर आहे. ५४ कर्मचाऱ्यांना निलंबित करण्यात आले आहे. तर सध्या कंत्राटी ९ चालक कामगार हजर आहेत.