Maratha Reservation: चांदोरीस महामार्गावर वाहतूक कोंडी; शासनाच्या विरोधात जोरदार घोषणाबाजी

चांदोरी : मराठा आरक्षणाचा तिढा सोडविण्यासाठी शासनाकडून सुरू असलेल्या चाल ढकल धोरणाच्या निषेधार्थ आणि मराठा समाजाला तत्काळ आरक्षण द्यावे या मागणीसाठी आक्रमक झालेल्या गोदाकाठ भागातील सकल मराठा समाज बांधवांनी गुरूवारी (ता. २) नाशिक- छत्रपती संभाजीनगर मार्गावरील चांदोरी त्रिफुली येथे सलग दोन तास रास्ता रोको आंदोलन केले. (Maratha Reservation andolan Traffic jam on Chandori Highway Strong slogans against government nashik)

सकाळी दहा वाजता गोदाकाठ भागातील सर्व बांधव एकत्र आले. 'एक मराठा,लाख मराठा','आरक्षण आमच्या हक्काचे', छत्रपती शिवाजी महाराज की जय, अशा विविध घोषणा देत या आंदोलनाला सुरुवात करण्यात आली.

या चांदोरी त्रिफुलीहुन नाशिक छत्रपती संभाजी नगर व ओझर शिर्डी मार्ग जात आहे. त्यामुळे या मार्गावरील वाहतूक आहे तेथेच थांबली गेली. थोड्याच वेळात वाहनांच्या रांगा लागल्या. हे आंदोलन अपेक्षेपेक्षा अधिक काळ चालल्याने पोलिसांनी वाहतूक अन्य मार्गाने वळवण्याचा प्रयत्न केला.

प्रांताधिकारी हेमांगी पाटील,तहसीलदार शरद घोरपडे यांनी श्रुष्टी मोगल,गीतांजली रुमणे या मुलींच्या हस्ते निवेदन स्वीकारला नंतर त हे मराठा बांधव निघून गेले व या मार्गावरची वाहतूक सुरळीत सुरु झाली.

पोलिसांचा तगडा बंदोबस्त

राज्यातील इतर भागातील मराठा आरक्षणाची धग बघता सायखेडा पोलिसांनी उपविभागीय पोलिस अधिकारी डॉ निलेश पालवे, सहायक पोलिस निरीक्षक सुनील पाटील, पोलीस उपनिरीक्षक विजय गायकवाड, शशिकांत सैंदाणे, बाळासाहेब कावळे यांच्या मार्गदर्शनाखाली मोठ्या प्रमाणात बंदोबस्त ठेवला होता.