नाशिक : पांढुर्लीला मुलाला जिवंत जाळल्याचा मातेचा आरोप

नाशिक : पांढुर्ली (ता. सिन्नर) येथील शैलेश ऊर्फ आवड्या विजय मोरे याच्या संशयास्पद मृत्यूची चौकशी करावी तसेच पुरलेला त्याचा मृतदेह उकरून काढून त्याचे शवविच्छेदन करावे, अशी मागणी वंचित बहुजन आघाडीचे महानगराध्यक्ष अविनाश शिंदे यांनी जिल्हा पोलिस अधीक्षक सचिन पाटील यांच्याकडे एका निवेदनाद्वारे केली आहे.

पांढुर्ली (ता. सिन्नर) येथील शैलेश ऊर्फ आवड्या विजय मोरे याच्या अंगावर पेट्रोल टाकून त्याला जिवंत जाळण्यात आल्याचा गंभीर आरोप त्याची आई अलका विजय मोरे हिने केला आहे. हा प्रकार अत्यंत घृणास्पद आणि माणुसकीला काळिमा फासणारा आहे. सदर महिला, त्यांचे पती विजय राणू मोरे यांच्यासह पांढुर्ली येथे वास्तव्यास आहे. मोलमजुरी करून हे कुटुंब आपले पोट भरतात. या कुटुंबाची व्यथा ऐकून घेऊन न्याय द्यावा, असे पोलिस अधीक्षक सचिन पाटील यांना दिलेल्या निवेदनात म्हटले आहे.