Nashik Crime : सातपूर औद्योगिक वसाहतीत लिफ्ट कोसळून मजुराचा मृत्यू; ठेकेदारावर गुन्हा दाखल

नाशिक : सातपूर औद्योगिक वसाहतीतील बाबासाई बेकरी कंपनीतील नवीन लिफ्टची टेस्टिंगचे काम सुरू होते. त्यावेळी बेरिंग निसटल्याने लिफ्ट तुटून सुमारे २० फुटांवरून खाली पडली. या अपघातामध्ये एक युवक ठार तर, तिघे गंभीररीत्या जखमी झाल्याची घटना शुक्रवारी (ता.१) सायंकाळी घडली होती. याप्रकरणी सातपूर पोलिसात ऋषीकेश इंजिनिअरिंग प्रा.लि.चे संशयित राहुल शिवाजी चोपडे यांच्याविरोधात मृत्युस कारणीभूत ठरल्याप्रकरणी गुन्हा दाखल झाला आहे. (Nashik Crime Laborer dies in Satpur industrial estate marathi news)

कुणाल चंदनवाल मोटवाणी (३२) असे मृत युवकाचे नाव आहे. शाहरुख खान (२५), दिनेश कमलेश बैठ (२५), कमलेश महेंद्र चंद्रवशी (२०) अशी जखमींची नावे आहेत. पोलिसांच्या माहितीनुसार, एशियन इलेक्ट्रॉनिक्ससमोर नव्याने निर्माण झालेल्या बाबा साई बेकरीत शुक्रवारी सायंकाळी मटेरिअल वाहून नेणाऱ्या लिफ्ट टेस्टिंगचे काम सुरू होते. (Latest Marathi News)

त्यावेळी संबंधित ठेकेदाराने निष्काळजीपणा केला. बेरिंग तुटल्याने लिफ्ट उंचावरून खाली पडली असता, चौघे जण गंभीर जखमी झाले. मोटवाणी यांना उपचारार्थ रुग्णालयात दाखल केले असता उपचार सुरू असताना मृत्यू झाला. जखमी तिघांवर उपचार सुरु आहेत. सातपुरातील पवन चंदवाणी यांच्या फिर्यादीनुसार संशयिताविरोधात मृत्युस कारणीभूत ठरल्याप्रकरणी गुन्हा दाखल झाला असून, हवालदार सूर्यवंशी तपास करीत आहेत.