Divisional Commissioner Praveen Gedam : विभागीय आयुक्तांकडून सोमवारी कुंभमेळ्याचा आढावा

Nashik News : मागील सिंहस्थाचा अनुभव असलेले विभागीय आयुक्त डॉ. प्रवीण गेडाम यांनी आत्तापासूनच कुंभमेळ्याची तयारी सुरु केली आहे. यासंदर्भात त्यांनी सोमवारी (ता. ८) दुपारी ३ वाजता जिल्हाधिकारी कार्यालयात बैठक बोलविली आहे. नाशिक आणि त्र्यंबकेश्वर येथे २०२७ मध्ये सिंहस्थ कुंभमेळ्याचे आयोजन करण्यात येणार आहे. (Divisional Commissioner Dr. Praveen Gedam)

यंदाच्या कुंभात देश-विदेशातून पाच कोटी भाविक हजेरी लावतील, असा अंदाज आहे. त्याअनुषंगाने प्रशासनाने सिंहस्थाचे नियोजनावर भर दिला आहे. परंतु, मध्यंतरीच्या काळात लोकसभा व त्यानंतर विधान परिषद शिक्षक मतदारसंघाच्या निवडणुकांच्या आचारसंहितेमुळे कामकाज काहीसे थंडावले होते.

मात्र, निवडणूक पार पडताच प्रशासन पुन्हा एकदा कुंभमेळ्याच्या तयारीला लागल्याचे चित्र आहे. विभागीय आयुक्त गेडाम यांनी कुंभाच्या तयारीत लक्ष घातले आहे. सिंहस्थाच्या नियोजनाशी निगडित यंत्रणांची बैठक बोलविली आहे. नाशिक शहरात कुंभाच्या दृष्टीने करावयाच्या विकास कामांसाठी महापालिकेने ११ हजार कोटी रुपयांचा आराखडा तयार केला आहे. (latest marathi news)

आराखड्यात रिंगरोड, नवीन रस्ते, प्रमुख रस्त्यांची दुरुस्ती, वाहनतळ, तात्पुरते निवारागृहे, साधुग्राम आदी कामांचा समावेश आहे. तसेच सार्वजनिक बांधकाम विभाग, एसटी महामंडळ, महावितरण अशा विविध यंत्रणाही त्यांच्या स्तरावर आराखडे तयार करत आहेत.

सर्व यंत्रणा मिळून सुमारे ३ ते साडेतीन हजार कोटी रुपयांची मागणी केली जाऊ शकते. त्याअनुषंगाने आयुक्त गेडाम यांनी बोलाविलेल्या बैठकीला विशेष महत्त्व प्राप्त झाले आहे. बैठकीत गेडाम तयारीसंदर्भात काय निर्देश देतात हे पाहणे औत्सुक्याचे ठरणार आहे.