नाशिक : गेल्‍या काही दिवसांपासून ढगाळ वातावरणामुळे उन्‍हाची तीव्रता कमी झाली होती. अशात सोमवारी (ता. २५) पुन्‍हा एकदा उन्‍हाचा चटका नाशिककरांना सहन करावा लागला. दिवसभर तीव्र सूर्य किरणांपासून बचाव करताना नाशिककरांची दमछाक झाली. उष्णतेच्या लाटेची (Heat waves) शक्‍यता वर्तविलेली असताना आगामी काही दिवस अशाच स्वरूपात उन्‍हाचा तडाखा कायम राहाण्याची शक्‍यता आहे.
सध्या नाशिकचे सरासरी किमान तापमान २० अंश सेल्सिअस, तर कमाल तापमान ४० अंश सेल्सिअसपर्यंत पोचले आहे. एप्रिल महिना संपत असताना आत्तापासून उन्‍हाची तीव्रता जाणवते आहे. सोमवारी कडक ऊन पडल्‍याने दिवसाच्‍या वेळी जनजीवन प्रभावित झाले होते. शहरातील प्रमुख बाजारपेठा व रस्‍त्‍यावर वर्दळ घटली होती. कामानिमित्त बाहेर असलेल्‍या नागरिकांकडून उपरणे, टोपी, रुमाल आदीच्‍या माध्यमातून सूर्य किरणांपासून बचाव केला जात होता. उष्णतेच्या लाटेच्‍या पार्श्वभूमीवर येत्‍या काही दिवसांत पाऱ्यात आणखी वाढ होऊन उन्‍हाळ्याची तीव्रता वाढण्याची शक्‍यता जाणकारांनी व्‍यक्‍त केली आहे.
आरोग्‍य सांभाळण्याची आवश्‍यकता
उन्‍हाची तीव्रता वाढत असताना आरोग्‍य सांभाळणे आवश्‍यक झाले आहे. अशात आवश्‍यकता नसताना उन्‍हात फिरणे टाळावे. कामानिमित्त बाहेर पडताना सर्व प्रतिबंधात्‍मक उपाय करावेत. तसेच, दिवसभरात सुमारे पाच ते सात लिटर पाणी प्‍यावे. शरीरासाठी पौष्टिक ठरेल अशा घटकांचा आहारात समावेश करावा, असा सल्‍ला तज्‍ज्ञांनी दिला आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
