कानबाई चालनी गंगेवरी, साखर पेरत चालनी माय

सिडको (जि. नाशिक) : ‘कानबाई चालनी गंगेवरी व माय चालनी गंगेवरी’, ‘साखर पेरत चालनी व माय साखर पेरत चालनी’, ‘कानबाई बसली चौरंगवरी व माय, बैसली चौरंगवरी’, ‘हिरवी पैठणी नेसली व माय पैठणी नेसली’, ‘हिरव्या बांगड्या हाती व माय बांगड्या हाती’, या आणि अशा विविध अहिराणी गीतांच्या गजरात सिडकोमध्ये रविवारी (ता. ७) खानदेशातील अनेक कुटुंबियांनी भक्तिभावाने कानबाईची प्रतिष्ठापना केली.

सोमवारी (ता. ८) सकाळी नऊला उत्तमनगर बस स्टॉप येथून भव्य मिरवणूक काढण्यात येणार असून, दुपारी तीनला उंटवाडीत कानबाईचे विसर्जन करण्यात येणार आहे. (sthapna of Kanbai with devotion Immersion procession today nashik Latest Marathi News)

श्रावण महिन्यातील पहिल्या रविवारी खानदेशात कानबाईची स्थापना केली जाते. यानिमित्त ज्या घरी स्थापना होते, त्या घरी सर्व नातलग आणि आप्तेष्ट जमा होतात. परंपरेनुसार कानबाईला पुरणपोळीचा नैवेद्य वाढण्यात आला.

अहिराणी भाषेत असलेल्या कानबाईच्या गीतांनी वातावरण भक्तिमय झाले. कोरोनामुळे बरेच नातेवाईक व गावकरी एकमेकांना भेटू शकले नव्हते. यंदा मात्र ही संधी मिळाल्याने भव्य मिरवणूक काढण्यात येणार आहे. यासाठी खानदेशी कुटुंबीय सज्ज झाले आहेत. गेल्या १४ वर्षांपासून हा उत्सव सिडकोमध्ये साजरा केला जातो.

कानबाई माता उत्सव समिती या मिरवणुकीचे संयोजन करीत आहे. जगताप मळ्यातील विहिरीत दुपारी तीनला कानबाई मातेचे विसर्जन करण्यात येईल. या उत्सवात सहभागी होण्याचे आवाहन रवी पाटील, नितीन माळी, यशवंत नेरकर, भगवान पाटील, सुरेश सोनवणे, रवींद्र पाटील, वसंत चौधरी, सुनील भारोटे आदींनी केले आहे.