ताडपत्रीचे दर कडाडले; शेतकरी वर्ग वळला बॅनर खरेदीकडे

साकोरा (जि. नाशिक) : पावसाळ्याच्या पार्श्‍वभूमीवर शेती आणि घराची डागडुजीची तयारी सुरू करण्यात आली आहे. त्यासाठी ताडपत्री खरेदीसाठी बाजारात शेतकऱ्यांची गर्दी होत आहे. शेतकऱ्यांनी साठवलेले अन्नधान्य सुरक्षित राहण्यासाठी या ताडपत्रीचा मोठ्या प्रमाणात वापर केला जातो. मात्र, मागील वर्षाच्या तुलनेत यंदा बाजारात ताडपत्रीच्या किमती २० ते ३० रुपये प्रतिकिलोने वाढलेला आहे. शेतकरी ताडपत्रीचे भाव वाढल्याने तात्पुरती सोय म्हणून बॅनर खरेदी करीत आहे.

पावसाळा सुरू झाला की शेतकरी साठवलेले अन्नधान्य पावसात भिजू नये, यासाठी प्लॅस्टिकच्या ताडपत्रीचा वापर करतो. जनावरांचा गोठादेखील या ताडपत्रीच्या मदतीने झाकला जातो. सर्वसामान्य नागरिकदेखील या ताडपत्रीचा मोठ्या प्रमाणात वापर करतात. पावसाच्या पाण्याने घराला गळती लागलेली असेल तर या ताडपत्रीचा वापर घराच्या पत्र्यांवर टाकण्यासाठी केला जातो. यामुळे पावसाळा सुरू होताच ताडपत्री व बॅनरला मोठी मागणी असते. नांदगावच्या बाजारात ताडपत्रीचे किलोमागे २०-३० रुपयांनी दर वाढल्यामुळे सामान्यांच्या खिशाला कात्री बसत आहे. पावसाला प्रत्यक्ष सुरूवात झाली की ताडपत्रीचे आणखी भाव वाढण्याची शक्यता आहे.

''देशात गेल्या काही दिवसांपासून महागाई दिवसेंदिवस वाढत आहे. दैनंदिन जीवनात लागणाऱ्या प्रत्येक वस्तूच्या किमतीवर झालेला आहे. अशा महागाईची झळ ताडपत्री खरेदीदारांना बसलेली आहे, असे दिसते.'' - ज्ञानेश्‍वर सुरसे, स्थानिक शेतकरी

''बाजारात मागणी वाढल्यास भाव वाढेल. मागीलवर्षी लॉकडाऊनमुळे बाजारातील ताडपत्री विक्री झाली नाही. यामुळे व्यापाऱ्यांनी गेल्यावर्षीची ताडपत्री यावर्षी विक्रीला काढली आहे. मात्र, पावसाळा सुरू झाल्यानंतर ताडपत्रीची मागणी मोठ्या प्रमाणात वाढू शकते.'' - शेख, ताडपत्री विक्रेता, नांदगाव