जुने नाशिक : रिक्षा प्रवासाचा बहाणा करून प्रवासी महिलांच्या पर्समधून सोन्याचे दागिने, रोकड चोरी करणाऱ्या दोन महिलांना मुंबई नाका पोलिसांनी अटक केली. त्यांच्याकडून चोरीचा मुद्देमाल जप्त केला आहे.
रिक्षात एकट्या प्रवासी महिलेस बघून दोन महिला लहान मुलासह रिक्षात बसतं. काही अंतरानंतर मुलास रडण्यास लावून प्रवासी महिलेकडे पाण्याची मागणी करीत होत्या. त्यादरम्यान नजर चुकवून संशयित महिला दुसऱ्या महिलांच्या पर्समधील सोन्याचे दागिने आणि रोकड लंपास करीत होत्या. सिडकोतील प्राजक्ता सोनजे ४ सप्टेंबर २०२१ ला मुंबई नाका येथून सिडकोकडे जात असताना, संशयित महिलांनी त्यांच्या पर्समधील सोन्याचे दागिने आणि रोकड, असा सुमारे २४ हजार ९६५ रुपयांचा ऐवज लंपास केला. त्यांच्या तक्रारीवरून मुंबई नाका पोलिस ठाण्यात गुन्हा दाखल झाला होता.
काठे गल्लीतील भारती गांगुर्डे द्वारका येथून शालिमारकडे रिक्षातून प्रवास करीत असताना, संशयित महिलांनी त्यांच्या पर्समधील ५० हजारांची चोरी केली होती. त्यांच्या तक्रारीवरून मुंबई नाका पोलिस ठाण्यात गुन्हा दाखल झाला होता. मुंबई नाका गुन्हेशोध पथक शनिवारी (ता. ७) मुंबई नाका बसस्थानक परिसरात गस्त घालत असताना, दोन संशयित महिला आढळून आल्या. चौकशीसाठी लहान मुलासह त्या दोघींना ताब्यात घेऊन पोलिस ठाण्यात आणले. त्यांची अधिक चौकशी केली असता, त्यांनी गुन्ह्याची कबुली दिली. चोरी करण्याची पद्धत सांगितली. पोलिसांनी तक्रारदार दोन्ही महिलांना बोलावून खात्री केली. त्यांनी संशयित महिलांना ओळखले. लक्ष्मी व्यंकटेश गाजवा (वय ३५), भाग्या राजू गाजवा (३८, दोन्ही रा. आळेफाटा जुन्नर, पुणे), तसेच चार वर्षांचा मुलगा असे ताब्यात घेण्यात आलेल्यांची नावे आहेत. वरिष्ठ पोलिस निरीक्षक सुनील राहोकले, निरीक्षक चंद्रकांत अहिरे यांच्या मार्गदर्शनाखाली गुन्हेशोध पथकाने ही कारवाई केली.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.