Dhule Bribe Crime : ‘तहसील’मधील खासगी पंटर रितेश ‘एसीबी’च्या ताब्यात

Dhule Bribe Crime : शिंदखेडा तहसील कार्यालयातील खासगी पंटर रितेश अरुण पवार याला मंगळवारी (ता. १०) दुपारी १४ हजारांची लाच घेताना शिंदखेडा येथील पाटण रस्त्यावरील पेट्रोलपंपाजवळ रंगेहाथ पकडण्यात आले.

धुळे येथील लाचलुचपत प्रतिबंधक पथकाने कारवाई केली. शिंदखेडा पोलिस ठाण्यात रात्री उशिरापर्यंत गुन्ह्याची नोंद करण्याचे काम सुरू होते. (Ritesh pawar arrested in bribe crime dhule news)

डांगुर्णे येथील तक्रारदार यांच्या मालकीची गावशिवारात शेतजमीन आहे. शेतजमिनीचे खातेफोड करण्यासाठी तक्रारदार तहसील कार्यालयात कागदपत्रे घेऊन आले असता खासगी पंटर रितेश पवार याच्याशी भेट झाली. खातेफोड करून देण्यासाठी तक्रारदार व सहधारक यांना ४ ऑक्टोबरला बोलावले.

खातेफोड प्रकरणाचे कामकाज करून दिले. कार्यालयातील नायब तहसीलदार, अधिकारी व कर्मचारी यांच्याशी माझे घनिष्ठ संबंध आहेत. तहसीलदार यांचा आदेश काढण्यासाठी २० हजारांची मागणी केली.

तक्रारीच्या अनुषंगाने ६ ऑक्टोबरला शिंदखेडा तहसील कार्यालयात जाऊन पडताळणी केली असता तडजोडीअंती १४ हजार रुपयांची मागणी केली. शिंदखेडा येथे मंगळवारी पंचांसमक्ष १४ हजार रुपयांची लाच घेताना रितेश रंगेहाथ मिळून आला.

लाचलुचपत प्रतिबंधक विभाग, धुळे शाखेचे उपअधीक्षक अभिषेक पाटील, निरीक्षक मनजितसिंह चव्हाण, हेमंत बेंडाळे, रूपाली खांडवी, राजन कदम, मुकेश अहिरे, प्रवीण मोरे, संतोष पावरा, प्रशांत बागूल, गायत्री पाटील, रामदास बारेला, प्रवीण पाटील, सुधीर मोरे, जगदीश बडगुजर यांनी ही कामगिरी बजावली.