चक्क बसच्या सीटखाली आढळून आला गांजा

नवापूर (जि. नंदुरबार) : शिरपूर-सूरत बस मध्ये नंदुरबार नवापूर दरम्यान गांजाची बॅग सीटखाली आढळून आल्याने एकच खळबळ उडाली. ८० हजाराचा आठ किलो सुका गांजा आढळून आला. याबाबत नवापूर पोलिस ठाण्यात अज्ञातांविरोधात गुन्हा दाखल करण्यात आला आहे. ही घटना शुक्रवारी (ता.३) दुपारी दोनच्या दरम्यान घडली. घटनेची माहिती बसचालक-वाहकाने नवापूर आगार प्रमुख राजेंद्र अहिरे यांना दिली. नवापूर आगार प्रमुखांनी सदर घटनेची माहिती नवापूर पोलिसांना दिली.

शिरपूर-सूरत बस नवापूर बस स्थानकावर आल्यावर वाहकाने सदर बॅग वाहतूक निरीक्षक सचिन पाटील यांच्याकडे जमा केली. पोलिस निरीक्षक बाळासाहेब भापकर यांनी पोलिस पथकासह घटनास्थळी येऊन पाहणी करून पंचनामा केला. बस मधील मिळालेला आठ किलो सुका गांजा ताब्यात घेतला, त्याची अंदाजित किंमत ८० हजार असल्याची माहिती सहायक पोलिस निरीक्षक नीलेश वाघ यांनी दिली. नवापूर पोलिस पुढील तपास करत आहे. दरम्यान, बसमधील प्रवाशांना दुसऱ्या बसने रवाना करण्यात आले.