एका गुन्ह्यात जामीन मिळताच दुसऱ्या गुन्ह्यात अडकला...

कामठी  (नागपूर) : नवीन कामठी पोलिसांनी छत्तीसगडच्या राजनांदगाव येथून चोरीच्या गुन्ह्यातील आरोपीला पकडून आणले व येथील दिवाणी न्यायालयात हजर केले. त्याला जामीन मिळाला; मात्र कळमना पोलिसांनी त्याला दुसऱ्या गुन्ह्यात अटक केली.

सविस्तर असे की, गोकूल तुळशीराम हरडे (वय ४५) शीतलामाता मंदिराजवळ, न्यू येरखेडा, कामठी यांची ४ ऑगस्टच्या रात्री कळमना मार्गावरील बालाजी मंदिरासमोर ठेवलेली चारचाकी हायड्रॉइक सिमेंट मिक्सर मशीन (किंमत तीन लाख रुपये) चोरट्याने चोरून नेली असल्याचे ५ ऑगस्टला सकाळी साडेसात वाजता निदर्शनास आले. नवीन कामठी पोलिस ठाण्याला तक्रार देण्यात आली होती. याची चौकशी करून राजनांदगाव येथील बिरुजू टोला (छत्तीसगड) येथे असल्याचे समजताच डीबी पथकासह छत्तीसगड येथे जाऊन ओरोपी भीमबली धनराज जांगडे (वय २९) रा. मिनीमता नगर, नागपूर याला अटक करण्यात आली. 

हेही वाचा : रामायणातील ‘हनुमान’ने नागपुरात दिली होती किंग काँगला धोबीपछाड; वाचा रुस्तम-ए-हिंदबद्दल...

त्याच्याकडून चोरून नेलेली मिक्सर मशीन व लाल रंगाचा महिंद्रा कंपनीचा ट्रॅक्टर (किंमत १ लाख ५० हजार रुपये) ताब्यात घेतला. हा ट्रॅक्टर कळमना पोलिस स्टेशन हद्दीतून चोरी केल्याचे सांगितले. कळमना पोलिसांना या ट्रॅक्टर चोरीचा छडा लावायचा होता. कामठी पोलिसांनी पकडलेला आरोपी हाच ट्रॅक्टर चोरीतील आरोपी असल्याचे कळमना पोलिसांना कळले. आरोपीला कामठीतील दिवाणी न्यायालयात हजर केले असता न्यायालयाने जामीन मंजूर केला. आरोपी न्यायालयाबाहेर येताच कळमना पोलिसांच्या डीबी पथकाने अटक केली. पुढील तपास कलमना पोलिस स्टेशनचे डीबी पथकाचे किशोर देवांगण करीत आहेत.

(संपादन : मेघराज मेश्राम)