चिंताजनक : मृत पॉझिटिव्ह रुग्णाच्या मुलीसोबत आता मुलगाही कोरोना बाधित!

अकोला : एकीकडे जिल्ह्यात कोरोना बाधित रुग्णांचे दुपार तपासणीचे रिपोर्ट निगेटिव्ह येत असताना दुसरीकडे मात्र पॉझिटिव्ह रुग्णांच्या संपर्कात आलेल्या त्यांच्या कुटुंबियांचे रिपोर्ट पॉझिटिव्ह येत असल्याची स्थिती आहे.

13 एप्रिल रोजी मृत्यू झालेल्या रुग्णाचा 15 एप्रिल रोजी प्राप्त झालेल्या अहवाल पॉझिटिव्ह आला होता. मृत्यू झालेल्या त्याच्या कुटुंबातील सतरा वर्ष मुलीचा शनिवारी प्राप्त झालेल्या अहवालात पॉझिटिव्ह आला होता तर रविवारी पुन्हा त्याच कुटुंबातील 14 वर्षीय मुलाचा अहवाल पॉझिटिव्ह आला आहे. आता अकोल्यात तीन वर्ष बालकासह या सतरा वर्षीय मुलगी आणि 14 वर्षीय मुलाचा पॉझिटिव्ह रुग्ण म्हणून समावेश झाला आहे.

आवश्यक वाचा - अकोला पोलिसांनी गुंडासाठी राबविला 'मुळशी पॅटर्न'

रविवारी (ता.19) सकाळी  प्राप्त अहवालानुसार, 32 अहवाल आज प्राप्त झाले. त्यामध्ये एका जणांचा अहवाल पॉझिटिव्ह आला असून 31 अहवाल निगेटिव्ह आले आहेत. पॉझिटिव्ह रुग्ण हा 14 वर्षीय मुलगा असून १३  एप्रिल रोजी मयत झालेल्या पॉझिटिव्ह रुग्णाची मुलगा आहे. या दोन्ही रुग्णाची प्रकृती स्थिर आहे. सद्यस्थितीत अकोला जिल्ह्यात तीन पॉझिटीव्ह रुग्ण आहेत. जिल्ह्यात एकूण 16 पॉझिटिव्ह रुग्ण आढळले आहेत.त्यापैकी एका जणाने आत्महत्या केली होती तर दुसऱ्याचा मृत्यू झाला होता. 

उर्वरित  रुग्णांपैकी अकरा जणांचे दुबार तपासणीचे रिपोर्ट निगेटिव्ह आले होते. तर एका तीन वर्ष चिमुकल्याचा दुबार तपासणीचा रिपोर्ट पॉझिटिव्ह आला होता. अशातच शनिवारी पुन्हा एका 17 वर्षीय मुलीचा प्राथमिक तपासणी  रिपोर्ट पॉझिटिव्ह आला आणि आज रविवारी पुन्हा त्याच कुटुंबातील मुलाचा रिपोर्ट पॉझिटिव्ह आला. असे जरी असले तरी ज्या 11 रुग्णांचा दुबार तपासणीचा रिपोर्ट निगेटिव्ह आला आहे त्त्यांच्या कोरोना तपासणीचे अद्यापही काही अहवाल येणे असल्याने त्यांना कोरोना मुक्त समजणे चुकीचे ठरणार.