अमरावतीतून निघणार लखीमपूर शेतकऱ्यांच्या अस्थिकलश यात्रा

अमरावतीतून निघणार लखीमपूर शेतकऱ्यांच्या अस्थिकलश यात्रा

अमरावती : संपूर्ण देशात खळबळ उडवून देणाऱ्या लखीमपूर येथील शेतकऱ्यांच्या दुर्दैवी मृत्यूनंतर त्यांच्या अस्थिकलश यात्रेला अमरावतीमधून सुरुवात होणार आहे.

लखीमपूर घटनेत शहीद झालेल्या शेतकऱ्यांचे अस्थिकलश घेऊन अस्थिकलश यात्रा ७ नोव्हेंबरला अमरावती शहरातून निघणार आहे. सकाळी ११ वाजता इर्विन चौकातून हिरवी झेंडी दाखवून या यात्रेला सुरुवात होईल. संयुक्त किसान मोर्चा, अ. भा. किसान संघर्ष समन्वय समिती, कामगार संघटना कृती समिती, जनआंदोलन संघर्ष समितीच्या संयुक्त विद्यमाने ही कलशयात्रा आयोजित करण्यात आली आहे.

यात्रेसंदर्भात माहिती देताना अशोक सोनारकर यांनी सांगितले, ७ व ८ नोव्हेंबरला जिल्ह्यातील नांदगाव खंडेश्वर, चांदूररेल्वे, तिवसा, मोर्शी, या तालुक्यांत फिरून तिवसामार्गे ९ नोव्हेंबरला वर्धा जिल्ह्यात ही यात्रा प्रवेश करेल. त्यानंतर टप्प्याटप्प्याने ही कलशयात्रा चंद्रपूर, भद्रावती, भंडारा, नागपूर, साकोली आदी ठिकाणी भ्रमण करेल. नागपूर येथे १८ नोव्हेंबरला बुटीबोरी येथून निघून संविधान चौकात जाहीर सभेच्या माध्यमातून या कलशयात्रेचा समारोप केला जाईल. समारोपीय कार्यक्रमाला किसान नेते अतुलकुमार अंजान मार्गदर्शन करतील.

कलश यात्रेत सहभागी होण्याचे आवाहन डॉ. महेश कोपूलवार, अशोक सोनारकर, संजय मांडवधरे, अरुण बनकर, महेश देशमुख, तुकाराम भस्मे, विजय रोडगे, सुनील मेटकर, डॉ. डी. ए. पवार, चंद्रकांत बानुबाकोडे, सुभाष पांडे आदींनी केले आहे.