वेकोलिच्या तीन कामगारांचा गुदमरून मृत्यू; गटार सफाई करताना दुर्घटना

राजुरा (जि. चंद्रपूर) : वेकोलिच्या बल्लारपूर क्षेत्रातील सास्ती-धोपटाळा टाउनशिप येथे गटाराची टाकी साफ (sewage tank) करताना वायूमुळे गुदमरून तीन कामगारांचा मृत्यू झाला, तर दोघांची प्रकृती गंभीर आहे. ही घटना मंगळवारी (ता. २२) सकाळी ९ वाजताच्या सुमारास घडली. राजू जंजर्ला (४२, रा. बल्लारपूर), सुभाष खंडाळकर (५२, रा. धोपटाळा) व सुशील कोरडे (२८, रा. गोवरी कॉलनी) अशी मृतांची नावे आहेत. एका कामगारास उपचारासाठी नागपुरात हलविण्यात आले. तर उर्वरित दोन कामगारांवर चंद्रपुरात उपचार सुरू आहेत (three died while cleaning the sewage tank)

प्राप्त माहितीनुसार, मंगळवारी सकाळी काही कंत्राटी कामगार आणि वेकोलिचे काही कामगार दहा फूट खोल असलेली टँक साफ करण्यासाठी उतरले होते. बराच वेळ होऊनही ते परत आले नाही. त्यामुळे त्यांच्या सहकाऱ्यांनी खाली हाक दिली. मात्र, कोणताच प्रतिसाद मिळाला नाही. त्यामुळे कंपनीचा एक कर्मचारी टँकमध्ये उतरला. मात्र, तोही वर आला नाही. त्याला हाक दिली; पण त्याच्याकडूनही प्रतिसाद मिळाला नाही.

त्यामुळे तेथे उपस्थित असलेले कामगार घाबरले. त्यांनी शेजारच्या लोकांना या घटनेची माहिती दिली. यानंतर तातडीने टँकवरील स्लॅब जेसीबीच्या मदतीने काढली. यावेळी तीन कंत्राटी कामगार व एक वेकोलि कामगार बेशुद्ध अवस्थेत असल्याचे दिसले. त्यांना बाहेर काढण्यासाठी रामपूर ग्रामपंचायतीचे सफाई कर्मचारी शंकर आंदगुला खाली उतरले. उपस्थितांच्या मदतीने सर्वांना बाहेर काढण्यात आले.

जखमी मजुरांना रुग्णालयात नेले असता पाच ते सात मिनिटांनी शंकर आंदगुला हेही बेशुद्ध पडले. त्यांना वेकोलिच्या रुग्णालयातही नेण्यात आले. या घटनेत एकूण पाच कामगार सापडले आहेत. यात राजू जंजर्ला आणि सुभाष खंडाळकर या दोन कंत्राटी कामगारांचा मृत्यू झाला. वेकोलिचे कामगार सुशील कोरडे यांचा नागपूर येथे उपचारादरम्यान मृत्यू झाला. वेकोलि कर्मचारी प्रमोद वाभिटकर, रामपूर गावातील कंत्राटी सफाई कामगार शंकर आंदगुला यांच्यावर जिल्हा सामान्य रुग्णालयात उपचार (Three injured) सुरू आहेत.

एकाही अधिकाऱ्यांनी भेट दिली नाही

एवढी मोठी दुर्घटना घडूनही, बल्लारपूर क्षेत्रीय मुख्य महाप्रबंधक यांचे कार्यालय अगदी जवळ असताना वेकोलिच्या एकाही वरिष्ठ अधिकाऱ्यांनी घटनास्थळाला किंवा रुग्णालयात भेट दिली नाही. मात्र, वेकोलिच्या कामगार संघटनांनी घटनास्थळी भेट देत मदतकार्यात सहभाग घेतला. दरम्यान, माजी केंद्रीय मंत्री हंसराज अहीर यांनी जखमींची जिल्हा रुग्णालयात भेट घेतली. त्यांची विचारपूस केली.

आर्थिक मदतीची मागणी

वेकोलिच्या क्षेत्रीय रुग्णालयात उपचारासाठी वैद्यकीय अधिकारी उपलब्ध नाही. वेकोलिच्या कार्यप्रणालीवर आरोप करीत दोषींवर कारवाई तसेच दुर्घटनेतील पीडितांना आर्थिक मदतीची मागणी करण्यात आली आहे.