कोरोना : "घरवापसी"त आरोग्य तपासणी बंधनकारक !
चंद्रपूर : चंद्रपूर जिल्ह्यामध्ये मोठ्या प्रमाणात पुणे, मुंबई व अन्य रेड झोनमधील नागरिक, कामगार, विद्यार्थी परतायला सुरवात झाली आहे. त्यामुळे बाहेरून येणाऱ्या प्रत्येक नागरिकाने आरोग्य तपासणी करणे, होम क्वारेटाइन होणे आवश्‍यक आहे. चंद्रपूर शहरात 2 मे व 13 मे रोजी पॉझिटिव्ह आढळलेल्या रुग्णांची प्रकृती स्थिर आहे. या दोन पॉझिटिव्ह नागरिकांशिवाय अन्य कोणताही पॉझिटिव्ह रुग्ण अद्याप शहरात नसल्याचे जिल्हा प्रशासनाने स्पष्ट केले आहे.
कृष्णनगर येथील पॉझिटिव्ह रुग्णाची प्रकृती स्थिर
आरोग्य विभागाने दिलेल्या माहितीनुसार 2 मे रोजी आढळलेल्या कृष्णनगर येथील पॉझिटिव्ह रुग्णाची प्रकृती स्थिर आहे. सध्या रुग्णावर नागपुरातील शासकीय वैद्यकीय महाविद्यालयात पुढील उपचार सुरू आहेत. कृष्णनगर येथील कंटेनमेंट झोनला 14 दिवस पूर्ण झाल्यामुळे या परिसराचे 14 दिवसांचे सर्वेक्षण पूर्ण झाले आहे. सध्या सर्वेक्षण बंद आहे. 13 मे रोजी आढळलेल्या बिनबागेट परिसरातील रुग्णाची प्रकृती स्थिर असून रुग्ण विलगीकरण कक्ष चंद्रपूर येथे भरती आहे. रुग्णाच्या संपर्कातील सर्वच 7 नागरिकांचे नमुने निगेटिव्ह आले आहेत. या परिसरात 4 आरोग्य पथकामार्फत 190 घरांचे सर्वेक्षण पूर्ण झाले आहे.
427 नागरिकांचे अहवाल निगेटिव्ह
जिल्ह्यातील कोविड-19 ची सर्वसाधारण माहिती पुढीलप्रमाणे आहे. यामध्ये आतापर्यंत 482 नागरिकांचे नमुने घेण्यात आले आहेत. यापैकी 2 नागरिक पॉझिटिव्ह असून, 427 नागरिकांचे अहवाल निगेटिव्ह आहेत, तर 53 नागरिकांचे अहवाल प्रतीक्षेत आहेत.जिल्ह्यात मोठ्या प्रमाणात नागरिक परत येत आहेत. या प्रत्येकाने आपली आरोग्य तपासणी करणे आवश्‍यक आहे. चंद्रपूर शहरामध्ये शकुंतला लॉन या ठिकाणी बाहेरून येणाऱ्या नागरिकांची नोंद व तपासणी करण्यात येत आहे. जिल्ह्याच्या अन्य तालुक्‍यांच्या ठिकाणी बसस्थानक परिसरात ही आरोग्य तपासणी व नोंदणी सुरू आहे.
14 हजार 554 नागरिकांचे गृहविलगीकरण
जिल्ह्यात 1 हजार 73 नागरिकांचे संस्थात्मक अलगीकरण करण्यात आले आहे. यापैकी तालुकास्तरावर 875 नागरिक, तर चंद्रपूर महानगरपालिकेमध्ये 198 नागरिक संस्थात्मक अलगीकरणात आहे. तसेच गृहअलगीकरण करण्यात आलेल्या एकूण नागरिकांची संख्या 49 हजार 478 आहे. सध्या जिल्ह्यामध्ये 14 हजार 554 नागरिक गृहअलगीकरण प्रक्रियेत आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.