संतापजनक : लाॅकडाउनमध्ये ऑन ड्यूटी पोलिस कर्मचार्‍याला मारहाण, पहा कुठे घडलाय हा प्रकार

बुलडाणा : कोरोना संकट काळात जीव धोक्यात घालून कर्तव्य निभावत असलेल्या पोलिस कर्मचार्‍यांचा संपूर्ण देश आणि सर्व समाजघटक गौरव करीत असताना एका पोलिस कर्मचार्‍याला गावगुंडांनी मारहाण केल्याची संतापजनक घटना काल, सोमवारी रात्री 8 वाजेदरम्यान येथील हुसैनिया मस्जीद चौकात घडली. आरोपींवर विविध कलमान्वये गुन्हे दाखल करण्यात आले आहेत.

येथील हुसैनिया मस्जीद चौकात पोलिस कर्मचारी राजेश निकाळजे नेमून दिलेली ड्यूटी करीत होते. सोमवारी (ता. 4) रात्री 8 वाजेदरम्यान 5 ते 6 जण मोटारसायकलवर फिरताना निकाळजे यांना आढळले. लॉकडाऊन असताना आणि जीवनावश्यक वस्तू घेण्यासाठी कालावधी संपलेला असताना कुणालाही बाहेर पडता येत नाही. त्यातच मोटारसायकलस्वार तरुणांनी तोंडावर  मास्क घातलेला नव्हता. 

हेही वाचा - माजी गृहराज्यमंत्र्यांची कन्या पुण्यात देतेय कोरोनाविरुद्ध लढा; फ्रंट लाईन वॉरियर म्हणून अविरत सेवा

पोलिस निकाळजे यांनी तरुणांना हटकले आणि घरी जाण्याचे सांगितले. पण तू कोण आम्हाला अडविणारा.. आम्ही कुणालाही घाबरत नाही, या शब्दांत या उडाणटप्पू युवकांनी पोलिसाला अश्‍लील शिवीगाळ करण्यात सुरवात केली. यातील एकाने धमकी दिली की, तो नगरसेवकाचा भाऊ आहे.. तुला पाहून घेऊ.. यानंतर निकाळजे यांनी पोलिस स्टेशनला फोन केला तर या सहा तरुणांनी त्यांना मारहाण करण्यात सुरवात केली. एकाने कॉलरही पकडली तर आणखी एकाने त्यांच्या हातातील काठीही हिसकावली. 

आवश्यक वाचा - स्वाभिमानीला दिलेला शब्द राष्ट्रवादी पाळणार का?

काही वेळाने इतर पोलिस त्याठिकाणी पोहोचले. मुख्य आरोपी जावेदसह तीन आरोपींना अटक करण्यात आली आहे. इतर फरार आहेत.  लॉकडाऊनची संचारबंदी असताना फिरणे, पोलिसाच्या कामात अडथळा निर्माण करणे, शिवीगाळ आणि धमकी देणे, तोंडावर मास्क न बांधणे, दंगा करणे, आपत्ती व्यवस्थापन कायद्याचा भंग करणे, अशा विविध कलमान्वये आरोपींवर कारवाई करण्यात आली आहे. या घटनेचे तीव्र पडसाद उमटत असून पोलिस कर्मचार्‍याला मारहाणीचा सर्वत्र निषेध होत आहे.