मरणानंतरही संपेनात माणसाच्या यातना...पावसात करावा लागतो मृतदेहावर अंत्यसंकार

अचलपूर (जि. अमरावती) : परतवाडा शहराला लागूनच असलेल्या कांडली गावात स्मशानभूमीची दयनीय अवस्था झाल्याने येथील गावकऱ्यांना अनेक गैरसोयींना तोंड देत अंत्यसंस्कार करावे लागतात. त्यामुळे मरणानंतरही माणसाच्या यातना संपत नसल्याची भीषण स्थिती निर्माण झाली आहे.

परतवाडा शहराच्या अगदी लागूनच असलेल्या पंचवीस हजार लोकसंख्येच्या कांडली गावातील स्मशानभूमी गैरसोयींच्या विळख्यात सापडली आहे. मरणानंतरही येथे माणसाची छळातून सुटका होत नसल्याचे दिसून येते. येथील स्मशानभूमीत अनेक समस्या "आ' वासून उभ्या आहेत. मृतदेहाची अवहेलना तर होतेच, शिवाय अंत्यसंस्कारासाठी आलेल्या लोकांना अनेक गैरसोयींना तोंड देत अंत्यसंस्कार करावा लागतो.

टिनाचे शेड फुटले, पावसात अंत्यसंस्कार

असाच प्रकार सहा जुलै रोजी घडला. भर पावसात एका पार्थिवावर स्मशानभूमीत अंत्यसंस्कार करावा लागला. परिणामी अंत्यसंस्कारासाठी जमलेल्या लोकांनी संताप व्यक्त केला. गावात स्मशानभूमी असणे सामाजिक गरज आहे. त्या स्मशानभूमीत सोयीसुविधा असणे अपेक्षित असते; तसेच आपण ज्या गावात जन्मलो; तेथेच आपल्याला मरण येऊन तेथेच आपला अंत्यसंस्कार व्हावा, अशी प्रत्येकाची इच्छा असते.
परंतु कांडली येथील स्मशनभूमीवरील टिनाचे शेड फुटल्याने ऊन, पावसातच अंत्यसंस्कार उरकावा लागतो.

जाणून घ्या : कोरोनामुक्त होऊनही करते ती लोकांच्या टोमण्यांचा सामना; कुटुंबालाही केले बहिष्कृत...

ग्रामविकास अधिकाऱ्यांना निवेदन

स्मशानभूमीत स्वच्छतेचा अभाव असल्याने लोकांना अनेक समस्यांचा सामना तर करावाच लागतो, पण येथील गैरसोय बघून त्रासलेल्या जीवनातून मरणही नकोसे वाटते. या स्मशानभूमीच्या झालेल्या दयनीय अवस्थेमुळे नागरिकांमध्ये प्रचंड प्रमाणात संताप व्यक्त होत आहे. या समस्येचे गांभीर्य लक्षात घेऊन गावातील तरुणांनी प्रीतेश अवघड यांच्या नेतृत्वाखाली ग्रामविकास अधिकारी विनोद मोरे यांना निवेदन सादर केले. या वेळी प्रीतेश अवघड यांच्यासह प्रथमेश ठाकरे, जय घोरे, अमन भंडारी आदी उपस्थित होते.