बापरे बाप...एवढ्या साऱ्या पिलांना जन्म! 

जेवनाळा (जि. भंडारा) : येथील सर्पमित्र समित हेमणे याने गावात आढळून आलेल्या घोणस जातीच्या सापाला पकडले. त्यानंतर घरी सुरक्षित ठिकाणी ठेवले असता रात्री सापाने 59 पिलांना जन्म दिला. त्यानंतर ही सर्व पिले सुरक्षित ठिकाणी सोडण्यात आली. 

सध्या पावसाळ्याचे दिवस आहेत. त्यामुळे सापांचा सगळीकडे मुक्तसंचार सुरू आहे. जेवनाळा येथे एका घरी गुरुवारी घोणस हा विषारी साप आढळून आला. त्याला नागरिकांनी इजा पोहोचवू नये म्हणून सर्पमित्र समित हेमणे, संदीप शेंडे, रोशन नैताम यांनी त्याला पकडून सुरक्षित स्थळी आणून ठेवले. साप पकडायला उशीर झाल्याने त्याला रात्रभर घरीच ठेवले.

अवश्य वाचा- `माझ्याशी लग्न कर अन् बायकोला हाकलून दे` प्रेयसीने तगादा लावल्याने प्रियकराने दिले विहिरीत ढकलून.... 

सकाळी त्याला जंगलात सोडायला नेण्यासाठी बघायला गेले असता त्या सापासोबत त्याचे 59 पिलं दिसून आले. सापाच्या भारामुळे पिलांना इजा पोहोचू नये म्हणून त्यांना वेगवेगळे करण्यात आले. या सापांना बघण्यासाठी अनेक सर्पमित्रांनी येथे भेट दिली. सापासह त्याच्या सर्व पिलांची अड्याळ येथील वनविभागाच्या कार्यालयात नोंद करून आरक्षित क्षेत्रात सोडण्यात आले. 

अवश्य वाचा- घरातच उघडला होता त्याने बनावट विदेशी दारूचा कारखाना, अन् एक दिवस... 

घोणस हा फार विषारी साप असून पर्यावरणासाठी उपयुक्त आहे. आम्ही या सापाला त्याच्या पिलांसह सुरक्षित सोडले आहे. परिसरात कोणताही साप आढळून आल्यास सर्पमित्रांना बोलावून त्यांना जीवनदान द्यावे. 
-समित हेमणे 
सर्पमित्र जेवनाळा. 
​

संपादन - राजेंद्र मारोटकर