टिनाच्या छपराचे सेंटर अन् वरून सूर्याचा प्रकोप, 'एप्रिल-मे'मधील कडक उन्हात विद्यार्थी परीक्षा कशी देणार?

नागपूर : राज्यातील बारावी आणि दहावीच्या विद्यार्थ्यांच्या परीक्षा २३ आणि २९ एप्रिलपासून सुरू होणार आहेत. बोर्डांकडून ज्या शाळेत विद्यार्थी शिकले, त्याच शाळेत परीक्षा घेण्यासाठी केंद्र आणि उपकेंद्रांची निर्मिती करण्यात आली आहे. मात्र, शहरीभाग वगळता, ग्रामीण भागातील ९० टक्के शाळांमध्ये मूलभूत सोयी-सुविधांचा अभाव आहे. विशेष म्हणजे, काही शाळांमध्ये टिनाचे शेड असून बहुतांश शाळांमध्ये पंखे आणि विद्युत पुरवठ्याचा अभाव असल्याने एप्रिल आणि मे महिन्याच्या कडक उन्हाळ्यात विद्यार्थी परीक्षा कशी देणार? हा प्रश्न निर्माण होणार आहे. 

हेही वाचा - क्या बात है! नागपूरचा भावेश 'इंडिया बुक'मध्ये; दुचाकीने केला सहा हजार किमीचा चतुष्कोन...

दरवर्षी बारावीची परीक्षा फेब्रुवारी ते मार्चदरम्यान होत असते. तसेच १ ते २५ मार्चदरम्यान दहावीची परीक्षा घेण्यात येते. मात्र, कोरोनामुळे यावर्षी २३ एप्रिल ते २१ मे दरम्यान बारावी तर २९ एप्रिल ते २० मे दरम्यान दहावीचे पेपर होणार आहेत. दरवर्षी विदर्भात नागपूर आणि अमरावती या दोन विभागातून दहावीच्या परीक्षेत पावणेचार लाख तर बारावीमध्ये सव्वातीन लाखावर विद्यार्थ्यांचा समावेश होत असतो. कोरोनामुळे यावर्षी ज्या शाळेत विद्यार्थी शिकले, त्याच शाळेत व कनिष्ठ महाविद्यालयात विद्यार्थ्यांना परीक्षा देता येणार आहे. शहरी भागात सुविधा असलेल्या शाळा असल्या तरी, ग्रामीण भागातील काही शाळा टिनाच्या शेडच्या आहेत. याशिवाय बहुताशं शाळांमध्ये सिलींग फॅन आणि पिण्याच्या पाण्याची व्यवस्था नाही. त्यामुळे अशा परिस्थितीत ४५ पेक्षा अधिक तापमानात विद्यार्थी कसा तीन तास पेपर सोडवेल? त्यामुळे विद्यार्थ्यांची प्रकृती बिघडल्यास जबाबदार कोण? असा प्रश्न शिक्षक संघटनांनी उपस्थित केला आहे. यावर्षी कडक उन्ह असेल, असा अंदाज हवामान खात्याने वर्तविला आहे. 

हेही वाचा - नागपूरकरांनो! आता 'आरटीओ'पासून थेट शहराबाहेर पडता येणार, सिग्नलचा त्रासही होणार कमी

बोर्डाने द्याव्या सुविधा 
विद्यार्थ्यांना केंद्रावर सोयी-सुविधा देण्याची जबाबदारी बोर्डाची आहे. त्यामुळे ही जबाबदारी त्यांनीच पाप पाडणे गरजेचे आहे. त्यासाठी केंद्रावर सोयी-सुविधा द्याव्यात असे मत विदर्भ माध्यमिक शिक्षक संघाचे अनिल गोतमारे व शिक्षक भारतीचे प्रा. सपन नेहरोत्रा यांनी व्यक्त केले.