नागपूर : शहरातील इतवारी भागात असणाऱ्या गंगा जमुना वस्ती (nagpur red light area) पोलिसांनी सील केली आहे. त्याविरोधात विदर्भवीर जांबुवंतराव धोटे यांची कन्या ज्वाला धोटे (ncp leader jwala dhote) यांनी आंदोलन केले. पोलिसांनी लावलेले सर्व बॅरिकेट्स तोडून त्यांनी कारवाईचा (nagpur ganga jamuna agitation) निषेध नोंदविला. यावेळी त्यांच्यासोबत शेकडो वारांगणा आंदोलनामध्ये सहभागी झाल्या होत्या.
गेल्या ११ ऑगस्टला पोलिसांनी गंगा जमुना वस्ती चारही बाजून बॅरिकेटींग लावून परीसर सील केला होता. यामध्ये देहव्यापार करण्यास मनाई केली होती. तसेच बाहेरील ग्राहकांना येण्यास देखील बंदी घातली होती. याठिकाणी अल्पवयीन मुलींकडून बेकायदेशीररित्या देहव्यापार करवून घेतला जातो. तसेच गुन्हेगार अंमली पदार्थांचा व्यापार चालवितात, असे पोलिसांचे म्हणणे आहे. त्यामुळे गुन्हेगारांवर वचक बसावा म्हणून पोलिस विभागाने कारवाई केल्याचे सांगितले जात आहे.
देहव्यापार बंद केला तर सरकार नोकरी देणार का?
दरम्यान, विदर्भ अन्याय निवारण समितीच्या अध्यक्षा आणि राष्ट्रवादी काँग्रेसच्या नेत्या ज्वाला जांबुवंतरावा धोटे यांनी वारांगणा यांना सोबत घेऊन आंदोलन केले. पोलिसांनी ही वस्ती सील करून येथील जागा धनदांडग्यांच्या घशात टाकण्याचा डाव असल्याचा आरोप त्यांनी केला. पण, या वस्तीतील घरे ही येथील वारांगणाच्या मालकीचे आहेत. त्यांना दुसरीकडे हाकलता येणार नाही. तसेच येथील देहव्यापार बंद करणार असेल तर शासन त्यांना नोकरी देणार आहे का? असा सवालही त्यांनी उपस्थित केला. तसेच बॅरिकेटींग तोडून पोलिसांच्या कारवाईचा निषेध नोंदविला.
आता आम्ही कुठे जायचे?
पोलिसांची कारवाई चुकीची आहे. आम्ही अनेक वर्षांपासून या वस्तीत राहून आमचे जीवन जगत आहोत. आमच्या मुला-बाळांना शिकविण्यासाठी लागणारा खर्च या व्यवसायातून निघतो. आमच्या पुढील पिढीने हा व्यवसाय करू नये, असेही आम्हाला वाटते. पण, सध्या आम्हाला तरी जगू द्या. आम्ही आहे तिथेच मरू. आम्ही गेल्या अनेक वर्षांपासून येथे राहत आहोत. आता आम्ही कुठे जायचे? असा प्रश्न वारांगणांनी उपस्थित केला.
आंदोलकांवर कारवाई करण्याचा इशारा -
आंदोलनाच्या पार्श्वभूमीवर पोलिसांनी मोठा फौजफाटा तैनात करण्यात आला होता. यावेळी आंदोलकांनी कायद्याचे उल्लंघन केले असून त्यांच्यावर योग्य ती कारवाई केली जाईल, असे नागपूर झोन तीनचे पोलिस उपायुक्त लोहित मतानी यांनी सांगितले.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.