मुलीच्या सासुरवाडीवरून पतरणाऱ्या आई, भावाचा अपघाती मृत्यू

नागपूर : भरधाव कारने दुचाकीला धडक दिल्याने मायलेक जागीच ठार झाले. हा भीषण अपघात नवीन कामठी पोलिस ठाण्यांतर्गत लिहिगाव पोलिस चौकीसमोर महामार्गावर घडला. मनीषा गोपाल खुरपडी (वय ४२) व अनिकेत गोपाल खुरपडी (वय २२, दोन्ही रा. गादा, ता. कामठी) अशी मृतांची नावे आहेत. (Mother-and-brother-killed-in-car-crash)

मनीषा यांच्या मुलीची सासुरवाडी उमरेड तालुक्यातील वडद गावी आहे. ते मुलीच्या घरी भेट देण्यासाठी मुलासह एमएच-४०, बीएम-३९१४ क्रमांकाच्या मोपेडने गेले होते. मुलीच्या घरून परत येत असताना लिहिगाव परिसरात महामार्गावर एमएच-४९, बीके-१७११ क्रमांकाच्या कार चालकाचे वाहनावरील नियंत्रण सुटले.

कारने दुचाकीला जोरदार धडक दिली. यात दुचाकी चकनाचूर झाली व दुचाकीवरील दोघेही मायलेक गंभीर जखमी होऊन जागीच ठार झाले. अपघातानंतर कारचालक पळून गेला. माहिती मिळताच नवीन कामठी पोलिस ठाण्याचे अधिकारी व कर्मचारी घटनास्थळी पोहोचले. पोलिसांनी पंचनामा करून मृतदेह शवविच्छेदनासाठी कामठीतील उपजिल्हा रुग्णालयात पाठवले. याप्रकरणी कारचालकाविरुद्ध गुन्हा दाखल करण्यात आला आहे.

दुचाकींची समोरासमोर धडक; एक ठार, एक गंभीर

भरधाव दोन दुचाकीची समोरासमोर धडक बसून झालेल्या अपघातात एक ठार तर एक गंभीर जखमी झाला. ही घटना भिवापूर-जवळी मार्गावरील नक्षी नदीच्या पुलाजवळ घडली. दिलीप गोपाळराव देशमुख (वय ५८, रा. तातोली) असे मृताचे तर सुरेश चौधरी रा. झिलबोडी असे जखमी दुचाकीचालकाचे नाव आहे. गंभीर मार लागल्याने त्याला नागपूरला हलविण्यात आले असून, प्रकृती चिंताजनक असल्याचे समजते. बुधवारी दुपारी मृत दिलीप देशमुख हे दुचाकी क्रमांक एम. एच. ४0/एम. ६३८७ ने भिवापूरवरून तातोलीला जात होते. नक्षी नदीवरील पूल ओलांडताच भरधाव येत असलेल्या दुचाकी क्रमांक एम.एच. ३१/डी.जे. 00८0 ला त्यांच्या दुचाकीची धडक लागली.

(Mother-and-brother-killed-in-car-crash)