रामदासपेठेतील डीपीला आग

नागपूर - रामदासपेठेतील सेंट्रल रोड मार्गावरील मृण्मय प्लाझा बिल्डिंग जवळील महावितरणच्या ११ केव्ही रिंगमेन युनिटच्या केबलला (डीपी) दुपारी चार वाजताच्या अचानक आग लागली. या घटनेची माहिती मिळताच महावितरणच्या कर्मचाऱ्यांनी तातडीने घटनास्थळी पोचून वीज पुरवठा खंडित केला. अग्निशमन दलाच्या साहाय्याने ही आग विझविण्यात आली.

रामदासपेठ भागातील ११ केव्ही रिंगमेन युनिटच्या केबलला दुपारी चार वाजताच्या सुमारास अचानक आग लागली. त्यामुळे परिसरातील वीज गेली. काही वेळातच त्या परिसरातील डीपीने पेट घेतला. आगीचे लोळ बाहेर निघत होते. तातडीने त्या परिसरातील वाहने हटविण्यात आली. माहिती मिळताच महावितरणची चमू घटनास्थळी पोचली. विजपुरवठा बंद करून आग विझविण्याचा प्रयत्न केला. आग मोठी असल्याने परिसरातील नागरिकांनी मनपाच्या अधिकाऱ्यांना संपर्क करून बोलविण्यात आले. त्यानंतर ही आग आटोक्यात आली.

दरम्यान, आग विझली की नाही हे पाहण्यासाठी त्या डीपीच्या चाव्या नसल्याने अग्निशमन दलाच्या जवानांनी काही भाग तोडला आणि आग विझविण्याचा प्रयत्न केला. त्याचवेळी स्फोट झाल्याने चांगलीच तारांबळ उडाली. आग विझविण्यासाठी तब्बल एक तास लागला. आगीमुळे प्रभावित ग्राहकांचा वीज पुरवठा महावितरणने तातडीने सुरु केला. मात्र, महावितरणचे अधिकारी या घटनेच्या वेळेस अनुपस्थित होते.