अपना भिडू, बच्चू कडू अकोल्याचे नवे पालकमंत्री

अकोला : गेली अनेक वर्ष जनतेच्या कामांसाठी थेट सरकार आणि अधिकारी वर्गाला अंगावर घेणारे बच्चू कडू यांची मतदारसंघासह संपूर्ण महाराष्ट्रात डॅशिंग आमदार अशी ओळख झाली आहे. गेल्या अनेक वर्षात त्यांनी वेगवेगळ्या विषयावर सरकारला धारेवर धरलं होतं. अनेक अधिकाऱ्यांना त्यांच्या स्टाईलने समज दिली होती. आता त्यांची अकोला जिल्ह्याचे पालकमंत्री म्हणून बुधवारी (ता.8) नियुक्ती करण्यात आली आहे.

प्रहार जनशक्ती पक्षाच्या माध्यमातून राज्यभरात अभिनव प्रकारचे आंदोलन करून आपली वेगळी ओळख निर्माण करणारे राज्यमंत्री बच्चू कडू हे अमरावती जिल्ह्यातील अचलपूर विधानसभा मतदारसंघाचे तीन टर्मपासून विधानसभेत प्रतिनिधित्व करत आहेत. गोरगरीब, दिव्यांग बांधवांच्या न्याय, हक्कासाठी त्यांनी आतापर्यंत विविध आंदोलन केली आहेत. त्यामध्ये अमरावती येथील गाडगे महाराज समाधी मंदिरासमोर राहूटी आंदोलन हे सर्वांधिक गाजले. तसेच सोफीया प्रकल्पाविरूद्ध त्यांनी पुकारलेला एल्गार असेल, यासह अधिकाऱ्यांच्या दालनात साप सोडणे, जमिनीत अर्ध नग्न गाळून घेणे, गांधीगिरी आंदोलनांचाही त्यामध्ये प्रामुख्याने समावेश आहे. 

राज्यमंत्री कडूंची अकोला जिल्ह्याच्या पालकमंत्री पदी वर्णी लागल्याने आता प्रशासनाला आपल्या कामात अनियमितता करून चालणार आहे, तसे झाल्यास त्यांचा सामना थेट त्यांच्याशी असेल. दर्यांपूर येथील दोन नायब तहसीलदारांचे निलंबनाची घटनाही ताजीच आहे. एकंदरीत जिल्ह्यातील विकास कामे, सामान्यांची प्रश्‍न आता तातडीने मार्गी लागू शकतात. 

हेही वाचा - Video : केंद्रीय राज्यमंत्र्यांच्या गावात कमळ कोमेजले

प्रहार विस्तारणार
प्रहार पक्षाच्या विस्तारासाठीही अनुकूल वातावरण यामुळे निर्माण झाले आहे. कारण प्रहार पक्षाची राजकीय पार्श्‍वभूमीची सुरूवात ही नजिकच्या अमरावती जिल्ह्यापासून असल्याने अकोल्यातही आता प्रहार विस्तारू शकणार आहे.

महत्त्वाची बातमी - आंबेडकर जिंकले, धोत्रे हरले!

शेवटच्या घटकांना न्याय देण्याचा प्रयत्न 
अकोल्या जिल्ह्याचे पालकत्व स्वीकारताना आनंद होत आहे. सर्वपक्षिय पदाधिकाऱ्यांच्या सूचना सर्वप्रथम स्वीकारून त्यावर काम करू. शिवाय गोरगरीब, दिव्यांग बांधवांना तसेच शेवटच्या घटकांना जागेवर न्याय देण्याचा आमचा प्रयत्न आहे.
- बच्चू कडू, पालकमंत्री