मोबाईल चोरी करून सोशल मीडियावर करत होता विक्री; अखेर अट्टल चोराच्या पोलिसांनी आवळल्या मुसक्या   

अमरावती ः मोर्शी तालुक्‍यातील येरला येथील वैभव नारायण अडोळे (वय २१) याच्याकडून पुन्हा गाडगेनगर पोलिसांनी तब्बल ३४ महागडे मोबाईल हॅण्डसेट जप्त केले. चोरीचा माल घेणाऱ्या वर्धा येथील व्यापाऱ्यासह त्याचे अमरावती येथील नातेवाईक अशा तिघांना गाडगेनगर पोलिसांनी अटक केली.

वैभव जेव्हा जेव्हा पोलिसांच्या हाती सापडतो तेव्हा तेव्हा पोलिसांनी एक किंवा दोन नव्हे तर दहाच्या वरच मोबाईल त्याच्याकडून जप्त केले. जे ३४ मोबाईल वैभवने चोरले त्यांची किंमत ३ लाख ४३ हजार रुपये आहे. या व्यतिरिक्त दुचाकीचा शौक पूर्ण करण्यासाठी त्याने नागपूर येथून ड्रीम निओ कंपनीची दुचाकीसुद्धा चोरून अमरावतीत आणली. त्या दुचाकीने तो शहरात टेहेळणी करीत होता. 

चिंताजनक! कोरोनासोबतच डेंगीचाही वाढला धोका, दोन महिन्यात ७४ रुग्ण

वैभवने हे मोबाईल गाडगेनगर, राजापेठ व फ्रेजरपुरा या तीन ठाण्यांच्या हद्दीतील घरांमधून चोरल्याची कबुली दिली. चोरलेल्या मोबाईलपैकी काही पंचेचाळीस, पन्नास तर बरेच पंचवीस हजार रुपये किमतीचे आहेत, असे पोलिस निरीक्षक मनीष ठाकरे यांनी सांगितले.

वैभवने हे मोबाईल शिवाजी चौक वर्धा येथील मोबाईल शॉपीचा संचालक शेख असलम शेख नूर याला विकले होते. शेख असलमचा नातेवाईक मोईन खान अजीज खान (वय २०, रा. अलीमनगर) याने शेख असलम याच्या माध्यमातून हे मोबाईल स्वीकारले होते. तिघेही गाडगेनगर पोलिसांच्या कोठडीत आहेत.

चोरीच्या मोबाईलची माहिती ओएलएक्‍सवर

वैभवने जे ३४ मोबाईल चोरले ते फायनान्स कंपनीने जप्त केल्याचे सांगितले. ते विकण्यासाठी ओएलएक्‍सवर माहिती टाकली. त्याने स्वत:चे नाव वैभव ऐवजी विष्णू असल्याचे शेख असलमसोबत व्यवहार करताना सांगितले.

ब्रेकअप झालं म्हणून भर रस्त्यात प्रेयसीवर केला चाकूहल्ला; नागरिकांनी केली प्रियकराची बेदम धुलाई

कारागृहातून सुटताच पुन्हा चोरी

लॉकडाउनच्या काळात वैभवला गाडगेनगर पोलिसांनी अटक केली होती. दोन महिन्यांपूर्वी जामिनावर सुटताच तो नागपूरला गेला. तेथून दुचाकी चोरून अमरावतीत परतल्यावर बापटवाडीत भाड्याची खोली करून राहत होता.

संपादन - अथर्व महांकाळ