esakal | औरंगाबादमधील दारूतस्करीचा यवतमाळात पर्दाफाश; बंदी असलेल्या जिल्ह्यात पाठवण्याचा डाव फसला
sakal

बोलून बातमी शोधा

police caught truck with illegal wine worth rupees 46 lacs

रेडिको एनव्ही डिस्टिलरीज महा. लिमिटेड कंपनीचे मालक, एनसीसी लॉजिस्टिक नाशिकचे मालक अमन चौधरी, ट्रक वाहन मालक गोकुल वाखुरे (रा. औरंगाबाद), चालक योगेश लघाने यांच्यासह अन्य व्यक्तींविरुद्ध गुन्हा नोंदविण्यात आला आहे.

औरंगाबादमधील दारूतस्करीचा यवतमाळात पर्दाफाश; बंदी असलेल्या जिल्ह्यात पाठवण्याचा डाव फसला

sakal_logo
By
सूरज पाटील

यवतमाळ : औरंगाबादमध्ये निर्माण होणार्‍या दारूची बंदी असलेल्या वर्धा व चंद्रपूर या जिल्ह्यांत दारूतस्करी होणार होती. मात्र, या तस्करीचा यवतमाळात पर्दाफाश झाला. पोलिसांनी एकूण 46 लाख रुपयांचा मुद्देमाल जप्त केला आहे. ही कारवाई यवतमाळ शहर पोलिस ठाण्याच्या पोलिसांनी केली.

रेडिको एनव्ही डिस्टिलरीज महा. लिमिटेड कंपनीचे मालक, एनसीसी लॉजिस्टिक नाशिकचे मालक अमन चौधरी, ट्रक वाहन मालक गोकुल वाखुरे (रा. औरंगाबाद), चालक योगेश लघाने यांच्यासह अन्य व्यक्तींविरुद्ध गुन्हा नोंदविण्यात आला आहे. शुक्रवारी (ता.18) रात्री यवतमाळ शहर पोलिस ठाण्याचे पथक पेट्रोलिंगवर असताना धामणगाव मार्गावरील नारिंगेनगर येथे एक ट्रक उभा असल्याची माहिती मिळाली. 

जाणून घ्या - २५ वर्षीय युवकाने उभारला देशातील पहिला ‘स्काय वॉक’; पंतप्रधान कार्यालयाने केले पंकजचे कौतुक 

लगेच पथकाने घटनास्थळ गाठले. पोलिस दिसताच दोघांनी कॅबिनमधून उतरून पळ काढला. ट्रकमधून दारूसारखा आंबट व उग्र वास येत असल्याने पोलिसांना अवैध दारूतस्करीचा संशय आला. रात्रीच्या वेळी वाहन रस्त्यावर उभे ठेवणे शक्य नसल्याने क्रेनच्या सहाय्याने शहर पोलिस ठाण्यात आणण्यात आले. ठाणेदार धनंजय सायरे यांनी प्राथमिक चौकशी करून पंचांसमक्ष पाहणी केली. 

त्यात विविध विदेशी दारूचा शासनाच्या मूल्यदरानुसार एकूण 36 लाख 85 हजार 761 रुपयांचा मद्यसाठा होता. वाहनाची किंमत दहा लाख रुपये असा एकूण 46 लाख 85 हजार 761 रुपयांचा मुद्देमाल जप्त करण्यात आला. याप्रकरणी यवतमाळ शहर पोलिस ठाण्यात गुन्हा नोंदविण्यात आला आहे. जिल्हा पोलिस अधीक्षक डॉ. दिलीप पाटील भुजबळ, अपर पोलिस अधीक्षक के. ए. धरणे, एसडीपीओ माधुरी बाविस्कर यांच्या मार्गदर्शनात ठाणेदार धनंजय सायरे, रवी आडे, राजकुमार कांबळे, अमित कदम, प्रवीण उईके, अंकुश फेंडर, अन्सार बेग आदींच्या पथकाने ही कारवाई केली. 

अधिक वाचा - काम करताना लघुशंकेसाठी गेलेली महिला परतलीच नाही; आरडाओरड होताच बसला धक्का

‘एक्साईज’चा मार्गच बदलला

एक्साईज (राज्य उत्पादन शुल्क विभाग)च्या अधिकार्‍यांनी वाहतूक परवान्यासाठी औरंगाबाद-जालना-नांदेड असा मार्ग दिला होता. मात्र, वर्धा अथवा चंद्रपूर या जिल्ह्यांत दारू नेण्यासाठी चक्क मार्गच बदलण्यात आला. सदर ट्रक हा धामणगाव मार्गावर बंदस्थितीत आढळून आल्याने तस्करीचा हेतू फसला आहे.


संपादन - अथर्व महांकाळ 
 

loading image