सिंदखेड राजा तहसीलदार पदी प्रवीण धानोरकर यांची नियुक्ती

सिंदखेड राजा तहसीलदार पदी प्रवीण धानोरकर यांची नियुक्ती करण्यात आली आहे. त्यांनी ता.१५ एप्रिल रोजी यांनी पदभार स्वीकारला आहे,पदभार स्वीकारताच त्यांनी कामाला सुरुवात केली आहे. शिस्तप्रिय अधिकारी म्हणून त्यांची ओळख आहे.

बुलडाणा जिल्हाधिकारी कार्यालयात अधीक्षक पदावर कार्यरत होते. या अगोदर त्यांनी यवतमाळ जिल्ह्यातील दिग्रस याठिकाणी तहसीलदार म्हणून काम केले आहे. यावेळी तहसीलदार प्रवीण धानोरकर यांनी सकाळ सोबत बोलताना सांगितले की,सर्वसामान्य नागरिकांना केंद्रबिंदू मानून त्यांच्या तात्काळ समस्या सोडवण्यासाठी प्रयत्न करणार असल्याचे यावेळी त्यांनी सांगितले.

ता.१२ एप्रिल रोजी तहसीलदार सचिन जैस्वाल यांना व त्यांच्या दोन सहकाऱ्यांना लाच प्रकरणी ताब्यात घेण्यात आले.त्यानंतर तहसीलदार पदी कोण नियुक्त होणार असा प्रश्न होता.दरम्यान,ता.१५ एप्रिल रोजी दुपारी प्रवीण धानोरकर यांना सिंदखेड राजा तहसीलदार म्हणून रुजू होण्याचे आदेश मिळाले.

तहसीलदार प्रवीण धानोरकर यांना चहूबाजूंनी आव्हानांचा सामना करावा लागणार आहे.त्यातच लोकसभा निवडणुक,तालुक्यातील अवैध वाळू वाहतूक, शेतकऱ्यांच्या समस्या,ऑनलाईन पद्धतीने होणाऱ्या कामांचे पोर्टल बंद असल्याच्या तक्रारी विशेष म्हणजे लाच प्रकरणानंतर महसूल प्रशासनात झालेले डॅमेज कंट्रोल ते कसे सुधारणार या कडे सर्वांचे लक्ष आहे.