दीपाली चव्हाण आत्महत्याप्रकरण : शिवकुमारला सोमवारपर्यंत पोलिस कोठडी

धारणी (जि. अमरावती) : मेळघाट व्याघ्रप्रकल्पाच्या हरिसाल वनपरिक्षेत्र अधिकारी दीपाली चव्हाण यांच्या आत्महत्येप्रकरणी उपवनसंरक्षक विनोद शिवकुमारला स्थानिक न्यायालयाने सोमवारपर्यंत (ता. २९) पोलिस कोठडीत ठेवण्याचे आदेश दिले आहे. पोलिसांनी तपासासाठी ३० मार्चपर्यंत पोलिस कोठडीची विनंती न्यायालयाकडे केली. बचाव पक्षाच्या वकिलांनी त्यावर युक्तिवाद केला. दोन्ही बाजू ऐकून घेतल्यावर न्यायालयाने २९ मार्चपर्यंत शिवकुमारला पोलिस कोठडीत ठेवण्याचे आदेश दिले.

दीपाली चव्हाण यांनी गुरुवारी (ता. २५) सायंकाळी हरिसाल येथे शासकीय निवासस्थानी स्वत:च्या सर्व्हिस रिव्हॉल्व्हरमधून गोळी झाडून आत्महत्या केली होती. आत्महत्येपूर्वी दिपाली यांनी लिहिलेल्या चार पानांच्या चिठ्ठीत उपवनसंरक्षक शिवकुमार यांच्या त्रासाचा उल्लेख केला होता. शुक्रवारी पोलिसांनी शिवकुमारला अटक केली व शनिवारी (ता. २७) धारणीच्या न्यायालयात हजर केले होते. यावेळी नागरिकांनी पोलिस ठाणे तसेच न्यायालयाच्या बाहेर चांगलीच गर्दी केली होती.

मांसाहार करणाऱ्यांनो धुळवडीला लवकर उठा अन् मटण घ्यायला जा, 'या' वेळेपर्यंतच दुकाने सुरू

पोलिसांनी तपासासाठी ३० मार्चपर्यंत पोलिस कोठडीची विनंती न्यायालयाकडे केली. बचाव पक्षाच्या वकिलांनी त्यावर युक्तिवाद केला. दोन्ही बाजू ऐकून घेतल्यावर न्यायालयाने २९ मार्चपर्यंत शिवकुमारला पोलिस कोठडीत ठेवण्याचे आदेश दिले. पुराव्यासाठी लॅपटॉप, मोबाईल, कागदपत्रे जमा करण्याच्या प्रक्रियेने आता वेग घेतला आहे. दीपाली चव्हाण यांनी आत्महत्येपूर्वी लिहिलेल्या चिठ्ठीत काही लोकं शिवकुमारचे कान भरत होते, असे नमूद केल्याने ते कोण आहेत? याचा शोधसुद्धा घेतला जाईल. अशा लोकांवर कारवाई झाली पाहिजे, अशी मागणी जमलेल्या नागरिकांनी केली.

गुन्हा दाखल झाला नसून, चौकशी सुरू
या प्रकरणात व्याघ्रप्रकल्पाचे तत्कालीन क्षेत्रसंचालक एम. एस. रेड्डी यांच्याविरुद्ध अद्याप गुन्हा दाखल झाला नसून, चौकशी सुरू आहे.
- विलास कुलकर्णी,
पोलिस निरीक्षक, धारणी ठाणे

नागपुरातून झाली होती अटक

मेळघाट व्याघ्रप्रकतील हरिसाल येथील वनपरिक्षेत्र अधिकारी दीपाली चव्हाण यांच्या आत्महत्या प्रकरणातील मुख्य आरोपी उपवनसंरक्षक विनोद शिवकुमार याला शुक्रवारी सकाळी नागपूर रेल्वे स्थानकावरून अटक करण्यात आली होती. तो कर्नाटकातील मूळगावी पळून जाण्याच्या प्रयत्नात होता. नागपूर लोहमार्ग पोलिस व अमरावती ग्रामीण पोलिसांनी संयुक्त ही कारवाई केली. यानंतर शिवकुमारला निलंबित करण्यात आले.

"माझं बाळ मला परत द्या हो"; दीपाली चव्हाणच्या आईचा टाहो; उपस्थितांच्याही डोळ्यांत पाणी

साध्या वेषातील पोलिसांनी केली अटक

आरोपी विनोद शिवकुमार कर्नाटकातील मूळगावी पळून जाण्याची शक्यता असल्याने पोलिसांनी संभाव्य ठिकाणांवर लक्ष केंद्रित केले होते. रात्रीच नागपूर लोहमार्ग पोलिसांना आरोपीच्या छायाचित्रासह माहिती कळविण्यात आली होती. त्या पाठोपाठ अमरावती पोलिसांचे पथकही दाखल झाले होते. सापळा रचून आरोपीचा शोध सुरू करण्यात आला होता. शुक्रवारी सकाळी ९.१५ वाजताच्या सुमारास पोलिस पाळतीवर असताना आरोपी नागपूर रेल्वेस्थानकावर आढळून आला. लागलीच साध्या वेषातील पोलिसांनी झडप घालून त्याला अटक केली. तो दिल्ली-बेंगळुरू राजधानी एक्स्प्रेसने पळून जाण्याच्या तयारीत असल्याचे चौकशीत पुढे आले.