समृद्धी महामार्गाच्या पुलाचा स्लॅब कोसळला; रात्रंदिवस चालणाऱ्या बांधकामाच्या दर्जावर प्रश्‍नचिन्ह

धामणगावरेल्वे (जि. अमरावती) : समृद्धी महामार्गाच्या निर्माणाधीन रस्त्यावरील बांधकामाच्या सिमेंटचा स्लॅब गुरुवारी (ता. सात) अचानकपणे कोसळल्याची घटना तालुक्‍यातील सावळा शिवारात घडली. या घटनेत जीवितहानी झाली नसल्याची माहिती समृद्धी प्रशासनाकडून देण्यात आली आहे.

तालुक्‍यातील सावळा शिवारात समृद्धी महामार्गाच्या रस्त्यावरील सिमेंटच्या स्लॅबचे बांधकाम सहा व सात जानेवारीला सुरू होते. गुरुवारी (ता. सात) सकाळी साडेसातच्या दरम्यान सदरचे बांधकाम पूर्ण करून झाले. या बांधकामावर असलेले मजूर बाहेर पडताच अर्ध्या तासातच सकाळी सव्वाआठच्या सुमारास अचानक सिमेंट स्लॅबचे हे बांधकाम कोसळले.

जाणून घ्या - 'तिच्या' घरी सुरु होती लग्नाची लगबग पाहुणेही होते तयार; तेवढ्यात आला फोन अन् एका क्षणात सगळंच संपलं

घटनेची माहिती मिळताच दत्तापूर पोलिस ठाण्यातील पोलिस निरीक्षक ब्रह्मदेव शेळके यांनी घटनास्थळ गाठले व पंचनामा करून घेतला. यावेळी समृद्धी महामार्ग प्रशासनाकडून कोणतीही जीवितहानी झाली नसल्याची माहिती दत्तापूर पोलिसांना देण्यात आली. रात्रंदिवस चालणाऱ्या महामार्गाच्या या बांधकामाच्या दर्जावर मात्र प्रश्‍न उपस्थित झाला आहे.

महाराष्ट्राचे मुख्यमंत्री उद्धव ठाकरे यांनी पाच डिसेंबरला या समृद्धी महामार्गाची पाहणी करून एक मे महाराष्ट्र दिनाला हा रस्ता नागपूर ते शिर्डीपर्यंत सुरू केला जाणार असल्याचे आश्‍वासन दिले होते. या शीघ्र संचार द्रूतगती मार्गाचे बांधकाम युद्धपातळीवर सुरू आहे. मोठ्या प्रमाणात असलेल्या मजुरांच्या हातून रात्रंदिवस रस्त्याचे बांधकाम सुरू आहे.

अधिक माहितीसाठी - अनेक दिवसांपासून बंद असलेल्या घराचं शेजाऱ्यांनी उघडलं दार; पलंगाजवळील दृश्य बघून भल्याभल्यांचा उडाला थरकाप

कोणीही जखमी किंवा जीवितहानी नाही
समृद्धी महामार्गाचा स्लॅब कोसळल्याची माहिती मिळताच घटनास्थळावर पाहणी केली व पंचनामा करण्यात आला आहे. या घटनेत कोणीही जखमी किंवा जीवितहानी नसल्याची माहिती समृद्धी महामार्गाच्या कर्मचाऱ्यांनी दिली. चौकशी करून पुढील तपास सुरू आहे.
- ब्रह्मदेव शेळके,
ठाणेदार, दत्तापूर

संपादन - नीलेश डाखोरे