शेजारच्यांनी शेतात असलेल्या आई-वडिलांना केला फोन अन्‌ फोडलेला हंबरडा होता हृदय पिळवटून टाकणारा

राळेगाव (जि. यवतमाळ) : कोदुर्ली श्रीरामपूर हे लहानसे गाव... गावातील भुसेवार कुटुंबाची परिस्थिती अंत्यत हलाखीची... आई-वडील मजुरीसाठी शेतात गेल्यावर तीन चिमुकल्या बहिणी घरीच राहायच्या... वयाने लहान असल्या तरी एकमेकींना जिवापाड सांभाळून घेत होत्या... क्षणात काळाने घाला घातला... त्यामुळे गावाच नव्हे, तर तालुक्‍यातून हळहळ व्यक्त होत आहे... काय सांगावे, काय बोलावे, भुसेवार दाम्पत्याची समजूत कशी काढावी... कुणाकडेही शब्द नव्हते... त्या घटनेमुळे अख्खे गावच निःशब्द झाले... 

पोलिसांनी दिलेल्या माहितीनुसार, राळेगावपासून अवघ्या सहा किलोमीटर अंतरावर कोदुर्ली श्रीरामपूर हे गाव आहे. येथील गजानन भुसेवार यांच्याकडे शेती असली तरी कुटुंबाचा गाडा ओढण्यासाठी दाम्पत्याला मजुरीदेखील करावी लागते. गुरुवारी भुसेवार दाम्पत्य मजुरीसाठी सकाळी शेतात गेले होते. यावेळी तीन बहिणी रिया भुसेवार (वय आठ), संचिता भुसेवार (वय सहा) व मोना भुसेवार (वय चार) या घरीच होत्या.

सविस्तर वाचा - म्हशीचे दूध उत्तम की गायीचे.. जाणून घ्या  कधी न सुटलेल्या कोड्याचे उत्तर..

बहिणी जेवण करण्यासाठी एकत्र बसल्या असताना मोठी रिया ही कुलर सुरू करण्यासाठी गेली. तिला विजेचा जोरदार धक्का लागला. मोठ्या बहिणीला काहीतरी झाल्याचे लक्षात येताच संचिता व मोना या धाव घेतली. या घटनेत तिघींचाही जागीच मृत्यू झाला. आई-वडील मजुरीसाठी शेतात गेल्याने तिघीही बहिणी काही वेळ तशाच निपचित पडून राहिल्या.

काही वेळाने ही घटना शेजाऱ्यांच्या लक्षात आली. घटनेची माहिती वडील गजानन व आई रेश्‍मा भुसेवार यांना मिळताच त्यांनी तत्काळ घर गाठले. तिन्ही काळजाचे तुकडे आपल्यात नाहीत, हे मान्य करायला दोघेही तयार नव्हते. लेकींना कवटाळत फोडलेला हंबरडा हृदय पिळवटून टाकणारा होता.

हेही वाचा - जे झटले दुसऱ्यांच्या संसारासाठी त्यांचेच हात आज रिकामे..वाचा मन हेलावून टाकणारी बातमी....

घटनेची माहिती मिळताच तहसीलदार डॉ. रवींद्र कानडजे, गटविकास अधिकारी रविकांत पवार, पोलिस उपनिरीक्षक दिलीप पोटभरे यांनी घटनास्थळ गाठले. पंचनामा करून तिघींचे मृतदेह शवविच्छेदनासाठी राळेगाव येथील ग्रामीण रुग्णालयात पाठविले. शवविच्छेदनानंतर सायंकाळी तिघीही चिमुकल्या बहिणींवर शोकाकूल वातावरणात अंत्यसंस्कार करण्यात आलेत. 

नियती कसा घात करेल, याचा नेम नाही

नियती कुठे दबा धरून बसली आहे आणि कसा घात करेल, याचा नेम नाही. आई-वडील मजुरी करण्यासाठी शेतात गेले असताना घरी असलेल्या चिमुकल्या तिघी बहिणींवर काळाने घाला घातला. कुलरचा शॉक लागल्याने तिघींचाही जागीच मृत्यू झाला. ही घटना तालुक्‍यातील कोदुर्ली श्रीरामपूर येथे गुरुवारी (ता. 30) सकाळी नऊच्या दरम्यान घडली. या घटनेने गावावर शोककळा पसरली.

अधिक माहितीसाठी - पतीने स्वतःच्याच पत्नीला केली ही विचित्र मागणी... अखेर कंटाळलेल्या पत्नीची पोलिसात धाव.. वाचा काय आहे संपूर्ण प्रकार..

मदत मिळण्यास अडचणी 
मुली लहान आहेत. घटना नैसर्गिक नसल्याने कुटुंबाला मदत मिळण्यास अडचणी येत आहेत. तरीदेखील महावितरण कंपनीला पंचनामा करण्यास सांगितले आहे. 
- डॉ. रवींद्र कानडजे, तहसीलदार

संपादन - नीलेश डाखोरे