लॉकडाउनच्या भीतीने व्यापारी धास्तावले, सर्वसामान्यांची चिंता वाढली

अमरावती : राज्यात कोरोनाचा पुन्हा उद्रेक झाल्याने मुख्यमंत्री उद्धव ठाकरे यांनी निर्वाणीचा इशारा दिला आहे. कुठल्याही क्षणी लॉकडाउन जाहीर होणार, अशा विविध चर्चा समाजमाध्यमांतून होत असल्याने व्यापारी चांगलेच धास्तावले आहेत. लॉकडाउनची धास्ती सर्वसामान्यांमध्ये सुद्धा दिसून आली.  

अमरावतीमध्ये कोरोनाची रुग्णसंख्या नियंत्रणात आल्याचे चित्र दिसून येत असले तरी राज्यस्तरावर मात्र कोरोनाचा मोठा उद्रेक होताना दिसतोय. अनेक जिल्हे कोरोनाचे हॉटस्पॉट ठरले असून राज्यात कठोर निर्बंध लादण्याबाबत राज्य शासनाकडून गांभीर्याने विचार करण्यात येत आहे. त्या पार्श्‍वभूमीवर शहरातील व्यापाऱ्यांमध्ये आतापासूनच चिंतेचे वातावरण दिसून येत आहे.

हेही वाचा - Success Story : शेतकरीपुत्र झाला उपनिरीक्षक; पालवाडी येथील रोशन राऊतचे प्रयत्न फळाला

जीवनावश्‍यक साहित्य वगळता अन्य व्यावसायिकांनी आगाऊ माल भरण्यास असमर्थता दर्शविली आहे. एकूणच लॉकडाउनच्या भीतीने आतापासूनच जनजीवन लॉक झाल्यासारखे चित्र दिसून येत आहे.  दरम्यान, शहरात कापडांची सध्या चांगलीच विक्री होत आहे. मात्र, पॅण्ट, शर्ट नव्हे तर घरातील वापरातील बमुर्डा आणि टी-शर्ट खरेदीकडे ग्राहकांचा जास्त ओढा दिसून येत आहे. लॉकडाउन लागले तर घरातल्या घरात हे कपडे वापरण्यास सोयीची असल्याने टी-शर्ट व बमुर्ड्याला चांगली मागणी आहे, असे विक्रेत्यांचे म्हणणे आहे. 

हेही वाचा - कोरोनाचे ‘सुपर स्प्रेडर’ बघायचे? चला नागपूरला; उपराजधानीतील बाजारात लोकांचा बेदरकारपणा

मजुरांनी धरली गावची वाट -
अमरावतीत बिहार तसेच उत्तर प्रदेशातून परप्रांतीय कामासाठी वास्तव्यास आहे. प्रामुख्याने गाड्यांवर कापड विक्री करणे तसेच गुपचूपच्या व्यवसायामध्ये जास्तीत जास्त परप्रांतीयांचा समावेश आहे. मात्र लॉकडाउनच्या भीतीने मागील वेळी झालेले हाल पुन्हा होऊ नये, यासाठी खबरदारी म्हणून अनेकांनी आपल्या गावचा रस्ता धरला आहे.