Success Story : शेतकरीपुत्र झाला उपनिरीक्षक; पालवाडी येथील रोशन राऊतचे प्रयत्न फळाला

तिवसा (जि. अमरावती) : प्रगतीसाठी शिक्षण हाच एक मोठा पर्याय आहे. त्यासाठी परिस्थितीला न जुमानता अभ्यासाची कास धरून ध्येय गाठणे सहजशक्‍य होऊ शकते. याच जिद्द व चिकाटीने तिवसा तालुक्‍यातील पालवाडी या सातशे लोकवस्तीच्या लहानशा गावातील शेतकरी कुटुंबातील रोशन सुधाकर राऊत या तरुणाने आपले पीएसआय होण्याचे स्वप्न पूर्ण करून आई-वडिलांचे तसेच गावाचे नाव उंचावले.

रोशनने आपले प्राथमिक शिक्षण पालवाडी गावात पूर्ण केले. पुढील शिक्षण ग्रामीण विकास विद्यालय वाठोडा, तर बीएचे शिक्षण यादव देशमुख महाविद्यालय तिवसा येथून केले. तिवसा शहरातील शाहू महाराज वाचनालय याठिकाणी दहा, दहा तास अभ्यास करून रोशनने राज्यसेवा परीक्षा उत्तीर्ण केली. परीक्षेचा निकाल हाती येताच गावातील मंडळींनी कौतुकाची थाप दिली.

अधिक माहितीसाठी - रणजित सफेलकरची पोलिसांनी काढली धिंड; अनवाणी पायाने, बरमुड्यावरच नेले न्यायालयात

रोशनचे आई-वडील दोघेही निरक्षर. मुलाने सव्वीसाव्या वर्षात यशाचे शिखर गाठले. आई-वडील स्वतः जरी शिकले नसले तरी त्याच्या आई-वडिलांनी त्याला पोटाची खडगी भरून यासाठी हातभार लावला. आज आपला मुलगा मोठ्या पदावर जाऊन पोहोचला, याचा आनंद त्यांना असून गावातील इतरही मुलांनी आई-वडिलांचे नाव तसेच गावाचे नाव मोठे करावे, अशीच अपेक्षा रोशनच्या आई-वडिलांनी बोलून दाखविली.

पदवीचे शिक्षण पूर्ण करून अधिकारी होण्याचे स्वप्न पूर्ण करण्यासाठी रोशनने कुठलीही शिकवणी न लावता वाचनालयात अभ्यास केला आणि सातव्या प्रयत्नात त्याची पोलिस उपनिरीक्षक म्हणून निवड झाली. नाशिक येथून पंधरा महिन्यांचे प्रशिक्षण पूर्ण करून येताच रोशनने आई-वडिलांचे आशीर्वाद घेतले.

अधिक वाचा - कुख्यात गुंड रणजित सफेलकरवर माजी मंत्र्यांचा वरदहस्त, पाच-पन्नास रुपायांची सवारी मारणारा ऑटोचालक झाला कोट्यधीश

मेहनतीच्या जोरावर यश

घरी अवघी दोन एकर जिरायत शेती व कुटुंबाच्या उदरनिर्वाहाची जबाबदारी पूर्णपणे शेतीवर तसेच आई-वडिलांच्या शेतमजुरीवर आहे. शेतात आई वडिलांना मदतही करून जिद्द, चिकाटी व कठोर परिश्रमाच्या बळावर जीवनात यश मिळवायचेच, असा निर्धार रोशनने केला. त्याने सतत दोन वर्षे येथील श्री राजश्री शाहू महाराज वाचनालयात रोज १२ तास अभ्यास केला. राज्यसेवा आयोगाच्या परीक्षेचा निकाल जाहीर झाला व त्याच्या घरी आनंदोत्सव साजरा झाला.

युवकांचा निर्धार

एका गावात मोठा पोलिस अधिकारी झाल्याने गावातील तरुणांच्या मनात आता जोश संचारला असून रोशनप्रमाणे आम्हीही पोलिस अधिकारी व मोठ्या शासकीय पदावर जाऊ, असा निर्धारच येथील युवकांनी केला आहे.

जाणून घ्या - अत्याचारानंतर विद्यार्थिनी चार महिन्यांची गर्भवती; ‘हेल्थ चेकअप’मध्ये आले सत्य पुढे

निर्णय व नियोजनबद्ध अभ्यास केला तर यश  प्राप्त होते
अभ्यासामध्ये सातत्य ठेवून सर्व तयारी करीत राहावी, कुठल्याही राज्यसेवेच्या जागा कमी किंवा जास्त त्यावर लक्ष न देता अभ्यास चालूच ठेवावा तसेच सर्व स्पर्धापरीक्षा देत राहाव्यात. निर्णय व नियोजनबद्ध अभ्यास केला तर यश नक्कीच प्राप्त होते. प्रत्येक दिवशी दोन ते तीन विषय अभ्यासाला घ्यावे.
- रोशन राऊत,
पीएसआय