विधान परिषदेच्या पटलावर शिक्षक, पदवीधरांचा आवाज राहणार मौन; कार्यकाळ संपला, अधिवेशनापूर्वी निवडणुकीची शक्यता नाही

नागपूर : यंदाच्या हिवाळी अधिवेशनात राज्याचे कायदेमंडळ असलेल्या विधान परिषदेच्या पटलावर पदवीधर आणि शिक्षकांचा आवाज फारसा गुंजनार नाही. या सभागृहातील एकूण चार सदस्यांचा कार्यकाळ संपला आहे. यापैकी दोन विदर्भातील आमदार आहेत. हिवाळी अधिवेशनापूर्वी निवडणूक होण्याची शक्यता नाही.

पदवीधर, शिक्षक, स्थानिक स्वराज्य संस्था निवडणुकांच्या माध्यमातून विधान परिषदेत प्रतिनिधी येतात. साधारणतः या क्षेत्राशी संबंधित प्रश्न, समस्या या प्रतिनिधी मांडाव्या, हा त्या मागचा उद्देश आहे. परंतु, यंदा हिवाळी अधिवेशनात नागपूर विभागातील पदवीधर तर अमरावती विभागातील शिक्षकांचे प्रतिनिधी नसेल. त्यामुळे त्यांच्या समस्याही प्रभावीपणे ऐकू येणार नाही.

सविस्तर वाचा - घरात अचानक जाणवू लागली प्रचंड उष्णता; कारण कळताच कुटुंबाने पहिल्या माळ्यावरून घेतल्या उड्‌या

सात डिसेंबरपासून विधिमंडळाचे हिवाळी अधिवेशन सुरू होणार आहे. नागपूर विभागातून पदवीधर मतदार संघातून अनिल सोले तर अमरावती विभागातून शिक्षक मतदार संघातून श्रीकांत देशपांडे सदस्य होते. त्याचप्रमाणे दत्तात्रय सावंत हे पुणे विभागातील शिक्षक मतदार तर सतीश चव्हाण औरंगाबादमधील पदवीधर मतदार संघातील विधान परिषद सदस्य होते.

त्यांचा कार्यकाळ १९ जुलै २०२० ला संपला. त्यांच्या जागांसाठी निवडणूक होणे अपेक्षित होते. परंतु, कोरोनामुळे केंद्रीय आयोगाने निवडणूक घेतली नाही. कार्यकाळ संपल्यामुळे त्यांना विधान परिषदेत बसता येणार नाही.

अधिक वाचा - सोन्याला झळाळी; साठ हजारांचा आकडा करेल पार, ग्राहकांची पावले वळू लागली दुकानांकडे

अंतिम यादीसाठी लागणार वेळ

पदवीधर मतदारांची अद्याप यादीच अंतिम झाली नाही. ही यादी अंतिम झाल्यानंतर काही दिवसांनी निवडणूक कार्यक्रम जाहीर करण्यात येईल. याला बराच काळ लागेल. त्यामुळे अधिवेशनापूर्वी निवडणूक होणे शक्य नसल्याचे समजते.

संपादन - नीलेश डाखोरे