Khed News: कडूस गावात भरदुपारी जादूटोण्याचा प्रकार,संपत्तीसाठी अघोरी पूजा | CCTV Viral | Sakal News

खेड तालुक्यातील कडुस गावात भरदुपारी उघडपणे घडलेल्या जादूटोणाच्या प्रकारामुळे परिसरात प्रचंड खळबळ उडाली आहे. दुपारच्या सुमारास एका बंद घराच्या दारात दही–भात, लिंबू, हळद-कुंकू लावून नारळ फोडल्याचा संपूर्ण प्रकार सीसीटीव्ही कॅमेऱ्यात स्पष्टपणे कैद झाला आहे. स्थानिकांच्या म्हणण्यानुसार, ज्या घरासमोर हा प्रकार घडला, त्या घरासंबंधी मालमत्तेचा वाद सुरु आहे. या वादातूनच जादूटोणा करण्यात आला असावा, असा अंदाज व्यक्त केला जातो आहे. संशयित व्यक्तीने घराच्या दाराशी आधी विधीवत दही-भात ठेवलं, त्यानंतर लिंबू आणि हळद-कुंकू लावलं, व शेवटी नारळ फोडल्याची दृश्यं कॅमेऱ्यात नोंदली गेली आहेत. परिसरातील नागरिकांनी त्या व्यक्तीस थांबवून विचारणा केली असता तो 'मुंबईहून आलोय' असं सांगत असल्याचंही समोर आलं आहे. मात्र त्याने जादूटोणा का केला, कोणासाठी केला आणि त्याचा मालमत्तेच्या वादाशी नेमका संबंध काय याबाबत अद्याप स्पष्टता नाही. घटनेनंतर गावात भीतीचं वातावरण पसरलं असून नागरिकांमध्ये चांगलाच संभ्रम निर्माण झाला आहे. स्थानिक प्रशासन आणि पोलिसांकडून या प्रकरणाची चौकशी सुरु करण्यात आली आहे. सीसीटीव्ही फुटेजच्या आधारे या संशयिताची ओळख पटवून पुढील तपास वेगाने सुरू असल्याची माहिती समोर येत आहे.