Nashik Rain News: नाशिक शहरासह जिल्ह्यात पावसाचा हाहाकार, नद्यांना पूर, रस्ते जलमय | Weather Update

नाशिक शहरासह संपूर्ण जिल्ह्यात गेल्या काही तासांपासून मुसळधार पावसाने हजेरी लावली असून, अनेक भागांत पूरपरिस्थिती निर्माण झाली आहे. धुवांधार पावसामुळे नाशिककरांचे जनजीवन पूर्णतः विस्कळीत झाले आहे. शहरातील मुख्य रस्ते जलमय झाले असून, रस्त्यांवर गुडघाभर पाणी साचले आहे. अनेक ठिकाणी वाहनचालकांना तळ्यासारख्या रस्त्यांमधून वाट काढावी लागत आहे. विशेषतः त्र्यंबकेश्वर शहरातील रस्ते पूर्णतः पाण्याखाली गेले असून, अनेक घरांत आणि वाड्यांमध्ये पाणी शिरल्याने मालमत्तेचे मोठे नुकसान झाले आहे. गोदावरी नदी पात्रातही पाण्याचा जोरदार विसर्ग सुरू असून, निफाड तालुक्यातील बाणगंगा नदीला पूर आला आहे. दिंडोरी तालुक्यातील धामण व कोलवण नद्या आणि नाले दुथडी भरून वाहत आहेत, त्यामुळे शेतपिकांना आणि वाहतुकीला धोका निर्माण झाला. त्यामुळे प्रशासनाने नागरिकांना सतर्कतेचा इशारा दिला आहे.