Parabani News: पाण्याच्या टाकीवर शोले स्टाईल आंदोलन, पुढे काय घडलं? | Pedgaon News | Sakal

परभणी जिल्ह्यातील पेडगाव येथे भीषण पाणीटंचाईमुळे ग्रामस्थांचे हाल सुरू असून, प्रशासनाच्या दुर्लक्षाविरोधात एक व्यक्ती थेट पाण्याच्या टाकीवर चढून ‘शोले’ स्टाईल आंदोलन करत तिथेच ठिय्या दिला. ही घटना कळताच गावात खळबळ उडाली असून, गणेश देशमुख असे आंदोलन करणाऱ्या व्यक्तीचे नाव आहे. जल जीवन मिशन अंतर्गत या वर्षी गावकऱ्यांना नळाद्वारे पाणी मिळण्याची अपेक्षा होती. मात्र, योजना प्रत्यक्षात न आल्यामुळे संपूर्ण गावाला भीषण पाणीटंचाईचा सामना करावा लागत आहे. अनेकदा निवेदने दिल्यानंतरही प्रशासनाने दखल घेतली नाही, त्यामुळेच गणेश देशमुख यांनी टाकीवर चढण्याचा निर्णय घेतला. घटनेची माहिती मिळताच गावातील नागरिकांसह पोलीस अधिकारी आणि ग्रामसेवक घटनास्थळी पोहोचले. चर्चेनंतर आणि लेखी आश्वासन मिळाल्यानंतर गणेश देशमुख टाकीवरून खाली उतरले.