जळगाव : शेडचे काम दिल्यानंतर ते पूर्ण न करता ४५ लाखांत शासकीय मक्तेदार असलेल्या एल. एच. पाटील कन्स्ट्रक्शनच्या संचालकाची फसवणूक केल्याप्रकरणी रामानंद पोलिसांत गुन्हा नोंदविण्यात आला आहे.
एल. एच. पाटील कन्स्ट्रक्शन प्रा. लि.चे संचालक लालसिंग हिलालसिंग पाटील (वय ७०, रा. जयनगर) शासकीय मक्तेदार असून, विविध प्रकारची कामे ते घेत असतात. सार्वजनिक बांधकाम विभागाचे अभियंता नाना उखा बोरसे यांच्या अधिपत्याखाली त्यांची काही कामे चालतात. १० जानेवारी २०१७ ला सार्वजनिक बांधकाम विभागाचे तत्कालीन अधीक्षक अभियंता बसवराज पांढरे यांच्या शासकीय निवासस्थानी कामास असलेले अक्षय ओंकार चोपडे (रा. पुणे) यांनी लालसिंग पाटील यांना बोलावून घेतले. अक्षय चोपडे या मक्तेदाराची ग्रॅव्हीटी ग्रुप नावाने कंपनी आहे. जिल्ह्यातील २५-३० लाख रुपयांपर्यंतची कामे त्यांना द्या, अशी विनंती नाना बोरसे यांनी लालसिंग पाटील यांना केली.
अशी झाली फसवणूक
त्यानुसार लालसिंग पाटील यांनी त्यांच्या मालकीच्या शिरसोली व नागदुली शिवारातील शेताच्या शेडचे बांधकाम करण्याचे काम अक्षय चोपडे यांना दिले. त्यापोटी १३ लाख ७८ हजार रुपयांचा धनादेशही दिला. पैसे दिल्यानंतर प्रत्यक्ष कामाला सुरवात केली नाही, म्हणून लालासिंग पाटील यांनी फोन करून विचारपूस केली. त्यावेळी अक्षय चोपडे यांनी उडवाउडवीची उत्तरे दिली. आपली फसवणूक झाल्याचे लक्षात आल्यानंतर लालासिंग पाटील यांनी गुरुवारी ९ जूनला दुपारी रामानंदनगर पोलिस ठाण्यात फिर्याद दिली. त्यानुसार नाना उखा बोरसे, अक्षय ओंकार चोपडे, दीपक गंगाराम लांघी व सुयेश गजानन तिटकरे या चौघांविरुद्ध गुन्हा दाखल झाला आहे. सुरवातीला दिलेले १३ लाख ७८ हजार रुपये, शासकीय नियमानुसार त्यावरील व्याज व शेडच्या कामाची आजची किंमत अशी ४५ लाखांत फसवणूक केल्याची फिर्याद त्यांनी दिली असून, रामानंद पोलिसांत गुन्हा दाखल झाला आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.