नाशिक : पोलिस अकादमीत येत्या शुक्रवारी दीक्षान्त सोहळा

नाशिक : त्र्यंबक रोडवरील महाराष्ट्र पोलिस अकादमीत (Maharashtra Police Academy) प्रशिक्षणार्थी पोलिस उपनिरीक्षकांच्या (PSI) १२१ व्या तुकडीचा दीक्षान्त सोहळा (Convocation Ceremony) शुक्रवारी (ता. १७) होणार आहे. (Convocation ceremony at Maharashtra Police Academy next Friday Nashik News)

पोलिस महासंचालक रजनीश सेठ प्रमुख पाहुणे असतील. राज्याचे अपर पोलिस महासंचालक (प्रशिक्षण व खास पथके) संजयकुमार यांची प्रमुख उपस्थिती राहील. दीक्षान्त सोहळ्यास शुक्रवारी सकाळी आठला महाराष्ट्र पोलिस अकादमीतील कवायत मैदानावर प्रारंभ होईल. प्रशिक्षणार्थी पोलिस उपनिरीक्षकांच्या १२१ व्या तुकडीतील १६० पुरुष व ११ महिला प्रशिक्षणार्थींचा समावेश आहे. त्यातील ६८ टक्के प्रशिक्षणार्थी पदवीधर व पदव्युत्तर असून, २ ऑगस्ट २०२१ पासून या तुकडीचे प्रशिक्षण सुरू होते. प्रशिक्षण कालावधीत प्रशिक्षणार्थींना भारतीय दंड संहिता, फौजदारी प्रक्रिया संहिता, भारतीय पुरावा कायदा, स्थानिक व विशेष कायदे, फॉरेन्सिक सायन्स, सायबर क्राइम, गुन्हेगारी शास्त्र, कवायत, शस्त्र कवायत, शारिरीक प्रशिक्षण, गोळीबार, योग आदी विषयांचे प्रशिक्षण देण्यात आले. सकाळी आठला संचलनास सुरवात होणार आहे. दीक्षान्त सोहळ्यास उपस्थित राहण्याचे आवाहन अकादमीच्या संचालकांनी केले आहे.