पारनेर : अल्पवयीन मुलीस पळवून नेऊन बलात्कार केल्याच्या गुन्ह्यातील आरोपी पोलिसांच्या तावडीतून पळाला. काल रात्री ही घटना पारनेर ग्रामीण रुग्णालयात घडली. पोलिसांनी रात्रभर परिसर पिंजून काढला. मात्र, आरोपीचा शोध लागला नाही. प्रवीण पोपट गायकवाड असे आरोपीचे नाव आहे.

 हेही वाचा येथे सलग दुसऱ्या दिवशी सापडला कोरोना रुग्ण 

याबाबत माहिती अशी की, प्रवीण याने वडझिरे येथील एका अल्पवयीन मुलीस चार मे रोजी पळवून नेले होते. त्या मुलीच्या वडिलांनी अज्ञात आरोपीच्या विरोधात पाच मे रोजी पारनेर पोलिस ठाण्यात फिर्याद दिली होती. त्यानंतर पोलिसांनी त्यास शनिवारी अटक केली असून, त्यास सात दिवसांची पोलिस कोठडीही न्यायालयाने सुनावली आहे. परंतु काल सायंकाळी आरोपीने त्रास होत असल्याचे सांगितले.

हेही वाचा कोरोनाविरुद्ध लढ्यात सरकारी यंत्रणेला याचा मोठा आधार 

त्यामुळे आरोपीस सायंकाळी साडेसहा वाजता ग्रामीण रुग्णालयात नेले होते. त्याची तपासणी करून आणले होते. मात्र, त्याने रात्री पुन्हा खूप त्रास होत असल्याचे नाटक केले व रात्री साडेआठ वाजण्याच्या सुमारास पारनेरचे पोलिस उपनिरीक्षक विजयकुमार बोत्रे यांच्यासह पथकाने आरोपीस पुन्हा ग्रामीण रुग्णालयात तपासणीसाठी घेऊन गेले असताना रुग्णालयात गेल्यानंतर आरोपी प्रवीण याने पोलिसांच्या हाताला झटका देऊन पळ काढला. पोलिसांनी ताबडतोब त्याचा पाठलाग केला. मात्र, अंधाराचा फायदा घेत तो पसार झाला. आरोपी पळून गेल्यानंतर पोलिसांनी रुग्णालयाचा परिसर, तसेच पारनेर-सुपे रस्ता, पारनेर-वडनेर रस्ता व त्या परिसरात रात्रभर शोध घेतला. पोलिसांना आरोपी सापडला नाही. 

तालुक्‍यात उलट चर्चा 
आरोपी पळाला की पळवून लावला, अशी चर्चा मात्र तालुक्‍यात आता रंगली आहे. आरोपीची एकदा आरोग्य तपासणी केली असताना पुन्हा आरोपीने त्रास होत असल्याची तक्रार केली. पहिल्या वेळी आरोपीचा पळून जाण्याचा प्रयत्न फसला असावा, म्हणूनच आरोपीने मला पुन्हा त्रास होत आहे, असे नाटक रात्री अंधार पडल्यावर केले असावे. तसेच आरोपी पळाल्यानंतर रुग्णालय परिसरातून आरोपीस घेऊन जाण्यासाठीसुद्धा यंत्रणा तयार असावी. कारण पोलिसांनी शोध घेऊनही आरोपी सापडला नाही, असे बोलले जात आहे.