अहमदनगर : मोटार सायकल व कार चोरीला आळा बसण्यासाठी नगरच्या एका अवलियाने नोकरीतून व्हीआरएस घेतली. मिळालेल्या रकमेतून स्वतःचे स्टार्टअप करत मोटारसायकल व कारसाठी लॉक बनविले. या अवलियाचे नाव विलास घोडके असे आहे.

एका खासगी कंपनीत नोकरी करणाऱ्या विलास घोडके यांनी २०१६ रोजी कार घेतली होती. काही दिवसानंतर ती चोरीस गेली. त्यामुळे त्यांनी हे दुख: कोणाच्याही वाट्याला येवू नये, यासाठी कारला एक सुरक्षित लॉक तयार करण्याचा निर्णय घेतला. निवृत्तीवेतनातून मिळालेल्या रकमेतून त्यांनी कारच्या क्लचला बसेल असे लोखंडी रॉडच्या लॉकची निर्मिती केली. त्यांनी स्वस्तात हे लॉक विक्रीसाठीही ठेवले आहेत. कारला अतिरिक्त सुरक्षा देण्यासाठी त्यांनी या लॉकची निर्मिती केली.

ज्यावेळी कार पार्किंग करून ठेवावी लागते त्यावेळी हे लॉक कारच्या क्लचमध्ये टाकून द्यावे लागते. अगदी दहा सेकंदात हे लॉक बसविता व काढताही येते. गॅस कटर अथवा कोणत्याही वस्तूने हे लॉक तोडता येत नाही. हे या लॉकचे वैशिष्ट्य आहे. हे लॉक टाकल्यानंतर कारचा क्लच किंवा ब्रेक दाबला जात नाही. त्यामुळे चोरट्याला कार चोरता येत नाही. लवकर दिसत नसल्याने लॉकची माहिती चोरट्यांना सर्वात शेवटी होते. त्यामुळे कार चोरी होत नाही. पेट घेण्याच्या भीतीने चोरट्याला कारमध्ये गॅसकटरचाही वापर करता येत नाही. हा पर्याय संपल्यानंतर चोरट्याला लॉक तोडणे अशक्य होते. या लॉकला त्यांना पेटंट मिळालेले आहे.

वार्षिक १४ लाखांची उलाढाल

घोडके यांनी २०१७ साली सुरू केलेल्या या स्टार्टअपची उलाढाल १४ ते १५ लाखांवर गेली आहे. २८ वर्षांच्या नोकरीतून निवृत्ती घेत मिळालेल्या रकमेतून हा व्यवसाय सुरू केला. त्यांच्याकडे चार कर्मचारी आहेत. मोटार सायकलसाठीही त्यांनी डीसब्रेक लॉक तयार केले आहे. त्यांच्याकडे रोज शंभरपेक्षा अधिक लॉक तयार होतात.

स्वत:ची कार चोरी गेल्याने एक सुरक्षित लॉक तयार करण्याची प्रेरणा मिळाली. त्यासाठी छोट्या छोट्या वस्तू एकत्र करून लॉक तयार केले. या लॉकमुळे मोटारसायकल व कार चोरीचे प्रमाण कमी होणार आहे.

- विलास घोडके,संचालक ओनम टेक्नॉलॉजी