पारनेर : नगर-कल्याण महामार्गावर आळे फाट्याजवळील लवणवाडी (ता. जुन्नर) येथे मालवाहतूक वाहनाने दोन दुचाकींवरील आठ जणांना धडक दिल्याने, दुचाकींवरील पाच जणांचा मृत्यू झाला. अपघातात चार जण गंभीर जखमी झाले आहेत. सर्व जण पारनेर तालुक्यातील पळशी, वनकुटे येथील नागापूरवाडीचे रहिवासी आहेत.

मृत्यू झालेल्यांमध्ये दोन चिमुकल्यांसह तीन जणांचा समावेश आहे. मृत्यू झालेल्यांची नावे सुंदराबाई रोहित मधे (वय २१), गौरव रोहित मधे (वय सहा), नितीन शिवाजी मधे (वय २२), आर्यन यमा मधे (वय दीड वर्ष), सुहास यमा मधे (वय २४).

सोमवारी रात्री ११ वाजेच्या सुमारास ही घटना घडली. सर्व जण नारायणगाव येथील शेतीत मजुरीचे काम अटोपून आपल्या गावी परतत होते. गावी परतण्यापूर्वीच त्यांच्यावर काळाने घाला घातला. यात चार जणांचा जागीच, तर एकाचा उपचारादरम्यान मृत्यू झाला.

विरुद्ध दिशेने समोरून आलेले वाहन न दिसल्याने दुचाकीस्वार व मालवाहतूक गाडी वेगाने एकमेकांवर आदळल्याने हा अपघात झाला. शेतात मजुरी करणाऱ्या कुटुंबातील, चौघांचा मृत्यू झाल्याने गावावर शोककळा पसरली आहे. यात सुंदराबाई, नितीन व गौरव हे तिघे एकाच कुटुंबातील आहेत.